'जनतासँग माओवादी' अभियान भदौ १६ बाट, यौटै घर नछोड्ने

सत्तारुढ नेकपा माओवादी केन्द्रले संगठन बिस्तारका लागि तीनमहिने विशेष अभियान संचालन गर्ने भएको छ । 

आज सम्पन्न माओवादीको केन्द्रीय समिति बैठकले 'जनतासँग माओवादी, विशेष रुपान्तरण अभियान' सञ्चालन गर्ने निर्णय गरेको हो । आगामी भदौ १६ गते देशभरका ६ हजार ७४३ वडाबाट अभियानको एकैसाथ उद्दघाटन गरिने जनाइएको छ । 

अभियानका क्रममा देशभरका प्रत्येक घरहरूमा पुगेर जनताको गुनासा र सुझाव संकलन गर्ने माओवादीको तयारी छ । 

अभियानलाई लक्षित गरेर माओवादीले प्रदेश इञ्चार्जहरु पनि तोकेको छ । जसअनुसार कोशी प्रदेशमा चक्रपाणी खनाल, मधेशमा लिलामणी पोखरेल, बागमतीमा जनार्दन शर्मा, लुम्बिनीमा हितमान शाक्य, कर्णालीमा मातृका यादव र सुदूरपश्चिम प्रदेशमा डिलाराम आचार्य इञ्चार्ज तोकिएका छन् ।

बैठक समापनअघि अध्यक्ष पुष्पकमल दाहाल प्रचण्डले आफूसमेत सातवटा प्रदेशको ७ वटा वडामा पुग्ने बताउनुभएको थियो । सोक्रममा प्रचण्डले माओवादी समर्थकमात्र नभई प्रत्येक जनताको घरमा पुग्ने उद्धघोश गर्नुभयो ।