ललिता निवास काण्डमा हिजो आंशिक,बाँकी मुध्दा आज लाने तयारी

बालुवाटारको ललिता निवास जग्गा प्रकरणमा थालिएको अनुसन्धान प्रतिवेदन आंशिक रुपमा हिजो बुझाइएको छ । नेपाल प्रहरीको केन्द्रीय अनुसन्धान ब्युरो (सिआइबी) ले गरेको पछिल्लो अनुसन्धान प्रतिवेदनको बाँकी अंश आज सरकारी वकिलको कार्यालयमा बुझाउन लागिएको हो । 

सरकारी वकिलको कार्यालय स्रोतले भन्यो, ‘बाँकी आज बुझाउने तयारी छ । हिजो केही बुझाएको छ । सिआइबीले टेक्निकल पार्ट आज बुझाउने भनेको छ ।’ उक्त प्रकरणमा मुछिएकामध्ये प्रारम्भमा एक सय जनावारे अनुसन्धान र छानबिन गरिएको थियो । 

सिआइबीभन्दा पहिले अख्तियार दुरुपयोग अनुसन्धान आयोगले कम्तिमा फेला परेका जति अधिकांशसङ्ग सोधपुछ गरेको थियो । अहिले सर्वोच्च अदालतको आदेश प्रष्ट नभएको भन्दै सिआइबीले दुई जना पूर्वप्रधानमन्त्रीलाई सोधनी नगरिकनै  मुद्दा  बुझाउन लागेको हो ।

स्रोत भन्छ, ‘तत्कालीन भौतिक योजना राज्यमन्त्री सञ्जय साह टक्लाको बयान लिइएको छ । अरु पूर्वमन्त्रीहरु फरार छन् । पक्राउ पुर्जी जारी भएका विजय गच्छदार, डम्बर श्रेष्ठ,र चन्द्रदेव जोशीलाई पक्राउ गर्न टोली खटाइएको छ । तर,ती फेला परेका छैनन् । पूर्व प्रधानमन्त्रीहरुको हकमा भने औपचारिक रुपमा बोल्न मिल्दैन ।’