काठमाडौंका मेयरद्वारा ‘नैतिकता’ को कारण देखाउँदै चीन भ्रमण रद्ध

काठमाडौं महानगरपालिकाका मेयर बालेन्द्र साह ‘बालेन’ ले आफ्नो चीन भ्रमण रद्ध गरेका छन् । सामाजिक सञ्जालमा लेख्दै उनले चीनको निम्तोमा गर्न लागिएको पाँच दिने भ्रमणमा नजाने निर्णय गरेको बताएका छन् । 

नेपालले २०७७ जेठ ७ गते लिपुलेक, लिम्पियाधुरा र कालापानी समेटेर नयाँ चुच्चे नक्सा सार्वजनिक गरेको थियो । तर, केही दिन पहिले चीनको प्राकृतिक स्रोत मन्त्रालयले जारी गरेको चीनको नक्सामा उक्त चुच्चोलाई बुच्चो बनाइएको भन्दै मेयरले नैतिकताको आधारमा चीन भ्रमणमा नजाने निर्णय गरेको बताएका छन् । 

उनले लेखेका छन्, ‘नेपाली भूभागलाई चीनले नेपाललाई नै नसोधी भारतको देखाउनु हाम्रो संवेदनशीलतामाथि चालेको गलत कदम मानेका छौं । त्यसैले मेरो चीनको निमन्त्रणामा हुँदै गरेको पाँच दिने भ्रमण नैतिकताको आधारमा नजाने निर्णय गरेको छु ।’