बाहिर ‘हरि’, भित्रभित्रै ‘राधा’

बुटवलमा प्युठानी नेता–कार्यकर्ताको जमघटपछि एमाले केन्द्रीय सदस्य हरि रिजालले विद्यार्थी नेता विनोद भण्डारीलाई छेउतिर राखेर भने, ‘मलाई त्यो केटाको कुनै भर छैन । हाम्रो सामुन्ने आएर चिल्लो कुरा गर्छ, उता गएपछि हराउन लाग्छ । मलाई त्यसको भर छैन । ’

एमाले लुम्बिनी प्रदेश कमिटीको अध्यक्ष बन्न कस्सिएका रिजालले हिजो प्युठानीहरुको सामुन्ने त्यसो भनिरहँदा बाँकी कार्यकर्ता ‘हो–मा हो’ थप्दै थिए । त्यसो त हरि पुनः एकपटक तर्सिएका छन् । उनलाई बुटवलमा तर्साइरहेका भनिएका पात्र हुन् एमाले पोलिटब्यूरो सदस्य सूर्य थापा ।

हरि र सूर्य दुबै प्युठानी हुन् । एमाले वृत्तमा रिजाल सूर्यका दाइको रुपमा परिचित छन् । राजनीतिक रुपमा चातुर्य सूर्य वर्षौंपछि जिल्ला फर्के पनि बिस्तारै उँभो लागेका र ‘हरि दाइ’ ओरालो लागेको कमरेडहरुबीच चर्चा हुने गरेको छ । 

उनै हरि महासचिव शंकर पोखरेलको गुटको प्रतिनिधित्व गर्दै प्रदेश अध्यक्षका आकांक्षी देखिएका छन् । सके सर्वसम्मत, नभए मतदानबाट भएपनि अध्यक्ष जिताउने दाबी उक्त गुटको छ । उनलाई जिताउन पोखरेल निकट भनेर चिनिएका नेताहरू बलराम अधिकारी, विमला घिमिरे, भूमिश्वर ढकाल, कुमार दसौदी, तेजेन्द्र केसी, शिव सुवेदी, टीकाराम खड्का, नरुलाल चौधरीको विशेष सक्रियता देखिएको बताइन्छ । 

तर, जिल्लावासी नेता एवम् सभासद् थापाले भने आवरणमा मात्र रिजाललाई अध्यक्ष बनाउनुपर्ने धारणा राखेको उल्लेख गर्दै उनको भित्री चाहना अर्कै रहेको प्युठानका एकथरी एमाले नेता तथा कार्यकर्ताको पाइन्छ । ‘सूर्यजी हरि दाइलाई जिताउन लाग्दैनन्, उनी राजनीतिक खेलाडी भइसकेका छन् । त्यसमा पनि हरि दाइ र सूर्यजीको सम्बन्ध चुनावपछि साखै राम्रो छैन ।’ एमाले प्युठान जिल्ला कमिटीका एक जना सदस्यले भने ।

गत आमनिर्वाचनमा सूर्य थापा प्रतिनिधिसभा र हरि रिजाल प्रदेशसभामा चुनावी प्रतिस्पर्धामा थिए । तर सूर्यले जिते, हरिले हारे । ‘त्यो चुनाव हरि रिजालले हारेका होइनन्, थापा कमरेडले हराएका हुन् । गोविन्द पोखरेलसँगको साँठगाँठले काम गरेको हो,’ एमाले निकट प्युठानका एक पत्रकारको बुझाइ छ ।

थापा अर्का अध्यक्षका आकांक्षी राधाकृष्ण कँडेलको सम्पर्कमा छन् । राधाकृष्ण भने एमाले उपाध्यक्ष विष्णु पौडेलनिकट अध्यक्ष हुन् । एमाले प्रदेश अध्यक्षको हैसियत पोलिटब्यूरो सदस्य सरह हो । सूर्यपनि पोलिटब्यूरो सदस्य हुन् । उनी राधाकृष्णलाई अध्यक्ष मान्न तयार भए पनि हरिको सम्बन्धमा फरक धारणा रहेको बताइन्छ ।

‘सूर्य कमरेड बुटवल आएदेखि खिमलाल भट्टराई, लिला गिरी, आरके दाइ, प्रदीप आचार्यसँगै हुनुहुन्छ । उहाँ आरके दाइको पक्षमा लाग्नुपर्दैन, चुप बसिदिएपनि पुग्छ,’ एमाले बुटवलका नेताहरुको विश्लेषण हो यो ।