आन्दोलनबारे राप्रपा नेताहरुको पार्टी कार्यालयमा सल्लाह

राजतन्त्र फर्काउने आन्दोलनअन्तर्गत आगामी २७ गते काठमाडौंमा विरोध जुलुस निकाल्न लागेको राष्ट्रिय प्रजातन्त्र पार्टी (राप्रपा) त्यसको तयारीमा जुटेको छ । आज राप्रपाका नेताहरुले बैठकमा आन्दोलनको तयारीबारे छलफल गरेका हुन् । 

विरोध कार्यक्रमलाई व्यापक र व्यवस्थित बनाउन राप्रपाले उपाध्यक्ष बुद्धिमान तामाङको अध्यक्षतामा ’उपत्यकाव्यापी बृहत् विरोधसभा मूल आयोजक समिति’ गठन गरेको छ । सो समितिमा उपाध्यक्ष रविन्द्र मिश्र, प्रवक्ता ज्ञानेन्द्र शाही, बाग्मती प्रदेश अध्यक्ष विक्रमबहादुर थापा, काठमाडौँका अध्यक्ष नवराज सिंखडासहित १३ वटै जिल्लाका अध्यक्ष सदस्य छन् । 

धुम्बाराहीस्थित पार्टी मुख्यालयमा आज दिउँसो बसेको समिति बैठकले विरोध कार्यक्रमलाई सशक्त बनाउन आवश्यक तयारीका काम गर्ने निर्णय गरेको बताइएको छ । 

राप्रपाले हिन्दुत्वको रक्षा, हिन्दुराष्ट्र, राजसंस्थाको पुनस्र्थापना, संघीयताको खारेजी र विभिन्न भ्रष्टाचार काण्डको छानबिनको माग गर्दै विरोधसभा गर्ने निर्णय अस्ति गरेको थियो । बेरोजÞगारी, मूल्यवृद्धि जस्ता विषयमा गम्भीर बन्न सरकारलाई दबाब दिने उद्देश्यले जुलुससहित  सभा गर्न लागिएको राप्रपाका नेताहरुले बताएका छन् ।