आउँदो चुनावमा सबै सीट जित्ने रवि लामिछानेको दावी
राष्ट्रिय स्वतन्त्र पार्टी (रास्वपा)का सभापति रवि लामिछानेले आगामी आमचुनावमा अन्य सबै राजनीतिक दलहरुलाई पराजित गर्ने बताएका छन् ।
आज ललितपुरमा आयोजित एक कार्यक्रममा उनले यस्तो दावी गरेका हुन् । पुराना पार्टीहरुले जनताको पक्षमा काम नगरेको जिकिर गर्दै लामिछानेले ०८४ को चुनावमा कुनैपनि दललाई एकसिट पनि जित्न नदिने बताए ।
‘हाम्रो आँखै अगाडि नयाँ दलका रुपमा २१ जना सांसदहरु सदनमा आएका छन् । स्थानीय तहमा एकसय एक होनहार मानिसहरु आएका छन्', उनले भने, 'तैपनि दिनदहाडै मान्छे काट्नेलाई संविधान दिवसका दिनमा मुक्ति दिएर ल के गर्न सक्छौँ ? भनेर हामीलाई चुनौती दिए ठाडै । हेर्दाहेर्दै । यस्त कयौँ बेथितिका चुनौतीहरु दिएका छन् ।
नेपालीहरुको सुनौलो भविष्य भन्ने दल र नेताहरुले आफ्ना मानिसका लागि सुनैसुनको महल खडा गरेको आरोप लगाएका लामिछानेले अगाडि भने, ‘एक दुई सिट दिनुपर्छ, पुराना पार्टी हुन् भन्ने लाग्छ भने के तपाई थप वाइडबडीमा भ्रष्टाचार भएको हेर्न चाहनुहुन्छ ? नेपालीलाई नक्कली भूटानी शरणार्थी बनाएर बेचेको अझै हेर्न चाहनुहुन्छ ?'
टिप्पणीहरू