माधव नेपालसँगै काँग्रेस नेता उत्तर प्रस्थान, पशुपति समशेरको दक्षिणबाट आगमन

नेकपा एकीकृत समाजवादीका अध्यक्ष तथा पूर्वप्रधानमन्त्री माधवकुमार नेपाल साताव्यापी चीन भ्रमणमा जानुभएको छ । उहाँ साँझ पौने ६ बजे काठमाडौंबाट चीनको युन्नान प्रान्तको खुनमिङ जानुभएको हो ।

चिनियाँ कम्युनिष्ट पार्टीको निम्तोमा १५ सदस्यीय प्रतिनिधिमण्डलको नेतृत्व गर्दै अध्यक्ष नेपाल चाइना इस्टर्न नेपालको उडान नम्बर एमयु ९६१८ मा त्यसतर्फ जानुभएको हो ।

टोलीमा श्रीमती गायत्रीसँगै कृषिमन्त्री बेदुराम भुसाल, नेताहरु विद्या  चाम्लिङ, सुधिर साह, विष्णु महतो, शर्मिला पौडेल, अब्दुल हुसेन खान, लोकबहादुर हमाल, गणेश विक, मोहन गौतम, हर्कबहादुर सिंह, विष्णु लम्साल, समशेर लामा र प्रकाश ढकाल रहेको बताइएको छ ।

सोही उडानमा नेपाली काँग्रेसका नेता तथा पूर्वमन्त्री राजन के.सी. पनि चीन गएका छन् । चीन जाने टोलीलाई बिदाई गर्न पार्टी उपाध्यक्ष राजेन्द्र पाण्डे, महासचिव घनश्याम भुसाल, चिनियाँ राजदूत छेन सोङलगायत त्रिभुवन अन्तर्राष्ट्रिय विमानस्थल पुग्नुभएको थियो ।

आजै राष्ट्रिय प्रजातन्त्र पार्टीका नेता तथा माननीय पशुपति समशेर राणा नयाँ दिल्लीबाट फर्कनुभएको छ । उहाँ भिस्तारा एयरको उडानमा साँझ पौने ५ बजे आइपुग्नुभएको हो ।