अष्ट्रेलियाका कप्तान आइपीएलमा हालसम्मकै महंगा

यसपटकको एकदिवसीय विश्वकप विजेता अष्ट्रेलिया क्रिकेट टोलीका कप्तान पाट कमिन्सले इण्डियन प्रिमियर लिग (आईपीएल) खेलाडी अक्सनमा नयाँ कीर्तिमान बनाएका छन् ।

दुबईमा जारी आईपीएलको खेलाडी अक्सनमा कमिन्सलाई सनराइजर्स हैदरावादले २० करोड ५० लाख भारु अर्थात् ३२ करोड ८० लाख नेपाली रुपैयाँमा किनेको हो । यो आईपीएलको इतिहासमा कुनैपनि खेलाडीका लागि तिरिएको अहिलेसम्मकै सबैभन्दा ठूलो रकम हो ।

यसअघि सन् २०२३ को अक्सनमा इङल्याण्डका साम कुरानलाई पञ्जाव किंग्सले १८ करोड ५० लाख भारुमा किनेको थियो । आइपीएलको सोही संस्करणमा अस्ट्रेलियाका क्यामरुन ग्रीनलाई मुम्बई इण्डियन्सले १७ करोड ५० लाख र चेन्नई सुपर किंग्सले इङल्याण्डका अलराउण्डर बेन स्टोकलाई १६.२५ करोडमा किनेको थियो ।

यसपटक न्यूजील्याण्डका युवा अलराउन्डर रचिन रविन्द्रलाई चेन्नई सुपर किंग्सले एक करोड ८० लाख भारुमा किनेको छ । त्यस्तै, चेन्नईले भारतीय बलर श्रदुल ठाकुरलाई ४ करोडमा किनेको छ भने अफगानिस्तानका अजमातुल्लाह ओमरजाईलाई गुजरात टाइटन्सले ५० लाख भारु तिरेको छ ।  

त्यसैगरी, सनराइजर्स हैदरावादले श्रीलंकाका वानिन्दु हसरंगालाई १.५ करोड भारु र विश्वकपमा शानदार प्रदर्शन गरेर अस्ट्रेलियालाई विश्वकप जिताएका ट्राभिस हेडलाई ६.८ करोड भारुमा किनेको छ ।

इङल्याण्डका विस्फोटक ब्याट्सम्यान ह्यारी ब्रुकलाई दिल्ली क्यापिटल्सले ४ करोड भारुमा किनेको छ भने वेस्टइन्डिजका रोभमन पावेललाई ५.४ करोडमा राजस्थान रोयल्समा आवद्ध हुने भएका छन् । 

आइपीएलको यो संस्करणमा केही नेपाली खेलाडीले पनि नाम समावेश गरेका थिए । तर, कुनै पनि टिमले नेपाली खेलाडीमा रुची देखाएनन् ।