अढाइ सय प्रहरीको तलबभत्ता हिनामिना गरेका पूर्वडीआईजी भ्रष्टाचारी ठहर

नेपाल प्रहरीका पूर्वडीआईजी तथा मदन पुरस्कार विजेता महेशविक्रम शाह भ्रष्टाचार मुद्दामा दोषी ठहर भएका छन् । शाहसहित अन्य तीन जनालाई पनि विशेष अदालतले दोषी ठहर गरेको छ । 

प्रहरी सेवाबाट अवकाश पाएलगत्तै शाहविरुद्ध प्रहरी जवानहरुको तलब हिनामिना आरोपमा अख्तियार दुरुपयोग अनुसन्धान आयोगले २०७६ फागुन २० गते मुद्दा दायर गरेको थियो । चार वर्षपछि अदालतले चार जनालाई दोषी ठहर गरेको हो ।

अध्यक्ष टेकनारायण कुँवर तथा सदस्यहरु रितेन्द्र थापा र तेजनारायण सिंह राईको संयुक्त इजलासले शाहसहित लेखापाल दिपेन्द्र सिंह पनेरु, लेखा सहायक केशवसिंह ऐरी र कोष तथा लेखा नियन्त्रक कार्यालय सिन्धुलीका तत्कालीन लेखापाल सञ्जीव विशंखेलाई दोषी ठहर गरेको हो । 

उनीहरुले १०३ जना प्रहरी जवानको दुई महिनाको तलब भत्ता वापत ३१ लाख ८८ हजार रुपैयाँ र १४२ जना नयाँ प्रशिक्षार्थी प्रहरी जवानहरुको नयाँ नियुक्तिको दुई दिनको एक लाख ४९ हजार ६३३ रुपैयाँ रकम हिनामिना गरेको प्रमाणित भएको छ ।