नावालिकामाथि करणी गरेको ठहर्याउँदै सन्दिप लामिछानेलाई जेल पठाउने आदेश

उमेर नपुगेकी किशोरी बलात्कारको मुद्दामा क्रिकेटर सन्दीप लामिछाने दोषी ठहर भएका छन् । यस्तै सजाय निर्धारणका लागि पुस २५ गते पेसी तोकिएको छ । 

मुलुकी फौजदारी अपराध संहिता २०७४ को २१९ (ङ) अनुसार अब न्यायाधीश ढकालकै इजलासले कैद या जरिवानाको सजाय निर्धारण गर्नेछ ।

उमेर नपुगेकी किशोरी बलात्कारको कसुरमा सन्दीपविरुद्ध २०७९ कात्तिक १४ गते अदालतमा मुद्दा परेको थियो । कात्तिक १८ मा जिल्ला अदालत काठमाडौँले उनलाई पुर्पक्षका लागि थुनामा राख्न आदेश दिएको थियो ।

 

तर, २०७९ पुस २८ गते उच्च अदालत पाटनले जिल्लाको आदेश उल्टाएपछि उनी रिहा भएका थिए । शर्तसहित २० लाख धरौटीमा छाड्ने उच्चको उक्त आदेशविरुद्ध सरकारी पक्ष सर्वोच्च अदालत पुगेको थियो । सर्वोच्चले उच्चको आदेश सदर गर्दै फास्ट ट्रयाकबाट मुद्दा किनारा लगाउन फागुन १५ गते अर्को आदेश दिएको थियो । 

सर्वोच्चको आदेशपछि पनि किशोरीको उमेर विवादका कारण जिल्ला अदालतले मुद्दा किनारा लगाउन सकेको थिएन ।