दिल्लीको यौन धन्दामा नेपाली युवती सप्लाई, ह्वाट्सएपको प्रयोग

नेपाली युवतीहरुलाई भारतको राजधानी नयाँ दिल्ली पुर्याएर यौन व्यवसाय सञ्चालन गर्दै आएका नेपाली दम्पती पक्राउ परेका छन् । नेपाल प्रहरीको मानव बेचबिखन तथा अनुसन्धान ब्यूरोबाट खटिएको टोलीले उनीहरुलाई नियन्त्रणमा लिएको हो ।

स्याङ्जाको गल्याङ नगरपालिका–७ घर भएका ३५ वर्षीय टिकाराम भण्डारी र उनकी पत्नी ३१ वर्षीया अस्मिता भण्डारी नेपाली युवतीलाई नयाँ दिल्लीसम्म पुर्याउने र यौन धन्दामा संलग्न भएको पाइएको हो । उनीहरुले दिल्लीस्थित विभिन्न होटल, रेस्टुरेन्ट, फेन्सी पसलमा आकर्षक तलब र सेवासुविधासहितको काम लगाइदिने प्रलोभनमा युवतीलाई त्यहाँ पुर्याएर वेश्यावृत्तिमा लगाउने गरेको पाइएको प्रहरीको दाबी छ । 

ब्यूरोका प्रवक्ता प्रहरी उपरीक्षक कृष्णप्रसाद पंगेनीले उनीहरुले दिल्ली किशनगढमा वेश्यावृत्तिको निम्ति अपार्टमेन्ट समेत भाडामा लिएको पाइएको छ । अपार्टमेन्टमा सीसीटिभी क्यामेरा जडान गरेर पीडितहरुलाई नयाँ मोबाइल, भारतीय सिम समेत उपलब्ध गराई हवाट्सएप, फेसबुक आईडी बनाइदिने र पासवर्ड आफैंले राखेर अनलाइन निगरानी गर्ने गरेको खुलेको छ । 
त्यस्तै, हवाट्सएप ग्रुप बनाई सम्पर्कमा आएका ग्राहकले अनलाइन भुक्तानी गरिसकेपछि मात्र युवतीहरुलाई ग्राहकले भनेको स्थानमा पठाउने गरेको पाइएको हो । वेश्यावृत्तिबाट आर्जित रकमको २० प्रतिशत मात्र पीडितलाई दिएर बाँकी ८० प्रतिशत भण्डारीका दम्पतीले लिने गरेको पनि ब्यूरोले जनाएको छ । 

ब्यूरोले दिल्लीस्थित नेपाली दूतावास, भारतीय प्रहरी तथा किंन इण्डियासँगको समन्वय र सहयोगमा पाँच जना युवतीको उद्धार गरेको हो । यसअघि गत चैत्र ७ गते भण्डारीका श्रीमान श्रीमतीले नै भारत पुर्याएका नौ जना युवतीको ब्यूरोले उद्धार गरेको थियो । 

उनीहरुविरुद्ध छ वटा मुद्दा दर्ता गरिएकोमा ती मुद्दाका तीन जना प्रतिवादी पक्राउ परेपछि भण्डारी दाम्पती फरार भएका हुन् । गत बुधबार कञ्चनपुरको भारतीय सीमा इलाकाबाट पक्रेर ल्याइएका उनीहरुलाई जिल्ला अदालत काठमाडौंमा पेश गरिएको छ ।