नेपालमा चोरिएका सयौँ मोटरसाइकल भारतमा बिक्री

नेपालमा मोटरसाइकल चोरेर भारतीय बजारमा बिक्री गर्ने गिरोहका दुइजना समातिएका छन् । मोरङ प्रहरीले उनीहरुलाई आज पक्राउ गरेको हो । 

पक्राउ पर्नेहरुमा सुनसरीको हरिनगरा-६ बस्ने ४० वर्षीय नजाम अन्सारी र भोक्राहा नरसिंह गाउँपालिका-२ का २३ वर्षीय निकाइल अन्सारी रहेका छन् । उनीहरुले मोरङ र सुनसरीका विभिन्न ठाउँबाट एक सयभन्दा बढी मोटरसाइकल चोरी गरेको जिल्ला प्रहरी कार्याल्य मोरङले जनाएको छ।  

नेपालमा चोरी गरेको मोटरसाइकल भारतको जोगवनी, फारवेसगन्ज र फुल्काहा लगायतका बजारमा लगेर बिक्री गरिएको पनि प्रहरी अनुसन्धानबाट खुलेको छ । दुवै जनालाई नियन्त्रण लिएर थप अनुसन्धान भइरहेको प्रहरीले जनाएको छ ।