पूर्वराष्ट्रपति विद्या भण्डारीद्वारा केपी ओलीको उच्च प्रशंसा

पूर्वराष्ट्रपति विद्यादेवी भण्डारीले एमाले अध्यक्ष एवं पूर्वप्रधानमन्त्री केपी शर्मा ओलीलाई नेपाली राजनीतिक सर्वाधिक प्रतिभाशाली नेताका रुपमा चित्रण गर्दै प्रशंसा गर्नुभएको छ ।

आज काठमाडौँमा ‘संसदमा केपी शर्मा ओली’ नामक पुस्तक लोकार्पण समारोहलाई सम्बोधन गर्दै उहाँले बिगतमा आफू उपाध्यक्ष रहेको पार्टीका अध्यक्षले राजनीतिमा खेलेको भूमिकाको खुलेर प्रशंसा गर्नुभएको हो । पूर्वराष्ट्रपति भण्डारीले ओली सबैका लागि प्रेरणा र ज्ञानको स्रोतको रुपमा रहन सक्ने नेताका भएको पनि बताउनुभयो ।

‘यस पुस्तकका नायक श्री केपी शर्मा ओलीज्यू समकालिन राजनीतिक नेताहरुमा पृथक पहिचान बनाउनुभएको नेता हुनुहुन्छ । सर्वाधिक प्रतिभाशाली नेताको रुपमा उच्च स्थान प्राप्त गर्न सफल उहाँ नेकपा एमालेको अध्यक्ष र प्रधानमन्त्री समेत भइसक्नुभएको व्यक्तित्व हुनुहुन्छ', भण्डारीले भन्नुभयो, 'उहाँ राजनीतिक साथै कला, साहित्य, संस्कृति एवं धर्म दर्शन र विज्ञान लगायतका विषमा समेत गहन ज्ञान भएको नेता हुनुहुन्छ। सघन अध्ययन र संघर्षमय जीवनको लामो अनुभवले खारिनुभएका नेता ओली हाम्रा लागि सदैव प्रेरणा र ज्ञानको स्रोत हुनुहुन्छ ।’

संसदमा ओलीले गरेका भाषणहरू राजनीतिक हिसावले मात्रै नभएर बहुविधागत ज्ञानका दृष्टिकोणले समेत महत्वपूर्ण रहेको पूर्वराष्ट्रपतिको भनाई छ । ति विषय संकलनीय र संग्रहणीय रहेको पनि उहाँले उल्लेख गर्नुभयो ।

'नेपालको लोकतान्त्रिक शासन व्यवस्था र राष्ट्रिय विकासका लागि राजनीतिक नेताहरुले गरेका सार्वजनिक अभिव्यक्तिहरुको दस्तावेजीकरणले ठूलो महत्व राख्दछ । अव यो संग्रह सबैको साझा सम्पति भएको छ । यस्ता अभिलेखहरु भावी पुस्ताका लागि विगत नियाल्ने आँखीझ्याल र इतिहास अध्ययनका लागि उपयोगी स्रोत सामग्री बन्न सक्दछ', पूर्वराष्ट्रपति भण्डारीले भन्नुभयो ।