विद्यार्थी संगठनहरुको कार्यक्रम रोक्न सिडिओको निर्देशन

काठमाडौंको लैनचौरस्थित अमृत साइन्स क्याम्पस हातामा आज हुनसक्ने सम्भावित झडप रोक्न जिल्ला प्रशासन कार्यालयले जिल्ला प्रहरी कार्यालयलाई निर्देशन दिएको छ । यसअघि पनि त्यहाँ विद्यार्थी संगठनहरुबीच मुठभेड तथा झडपका घटना भइरहेको सिडिओ कार्यालयले जनाएको छ ।

प्रशासकीय अधिकृत अनुप पौडेलले हिजो जिल्ला प्रहरी कार्यालयलाई लेखेको पत्रमा आज अमृत क्याम्पसको हातामा अनेरास्ववियू र अनेरास्ववियू (क्रान्तिकारी) को कार्यक्रम राखिएको उल्लेख छ । सम्भावित झडप रोक्न दुबै विद्यार्थी संगठनको कार्यक्रम रोक्न प्रहरीलाई निर्देशन दिइएको छ ।

सिडिओको आदेशपछि जिल्ला प्रहरी कार्यालयले लैनचौर वृत्तलाई आवश्यक प्रबन्धको निम्ति निर्देशन दिएको छ । आजको कार्यक्रम रोकिएको र प्रहरीले सुरक्षा व्यवस्था मिलाइएको सम्बन्धमा पनि क्याम्पस प्रशासनलाई जानकारी दिन जिल्ला प्रहरी कार्यालयले वृत्तलाई दिएको आदेशमा उल्लेख छ ।

अनेरास्ववियूको खेलकुद तथा स्वयम्सेवक विभागले १० बजे क्याम्पसमा स्वयम्सेवक भेला तथा प्रशिक्षण कार्यक्रम राखेको छ । क्रान्तिकारीको उपत्यका विशेष प्रदेश समितिले बलिदान दिवसको अवसरमा ११ बजे कार्यक्रम राखिएको जनाएको छ ।