एमाले अध्यक्ष धनगढी प्रस्थान, दुर्गा प्रसाईं भरतपुर

एमाले अध्यक्ष तथा पूर्व प्रधानमन्त्री केपी शर्मा ओली काठमाडौंबाट धनगढी जानुभएको छ । उहाँ कञ्चनपुरको दोधारा चाँदनी नगरपालिका वडा नम्बर ६ को कार्यालय भवन उद्घाटनका लागि त्यसतर्फ जानुभएको बताइएको छ ।

उहाँसँगै उद्योग, वाणिज्य तथा आपूर्तिमन्त्री दामोदर भण्डारी, पूर्वमन्त्रीद्वय कर्णबहादुर थापा र छबिलाल विश्वकर्मा पनि धनगढी जानुभएको छ । अध्यक्ष ओलीको टोली बुद्ध एअरको उडानमा बिहान साढे ९ बजे त्यसतर्फ प्रस्थान गरेको हो ।

आजै राष्ट्र, राष्ट्रियता, धर्म संस्कृति र नागरिक बचाऔं महाअभियानका संयोजक दुर्गा प्रसाई भरतपुर गएका छन् । उनी बिहान पौने १० बजेको उडानमा काठमाडौंबाट त्यसतर्फ प्रस्थान गरेको बताइएको छ । प्रसाईं भरतपुरमा आयोजित आमसभालाई सम्बोधन गर्न गएका हुन् ।

प्राप्त जानकारीअनुसार एमाले महासचिव शंकर पोखरेल बिहान साढे ९ बजे बुद्ध एअरको उडानमा सिमरा जानुभएको छ । राप्रपा नेता, सांसद तथा पूर्वमन्त्री पशुपति समशेर राणाको आज दिउँसो पौने ५ बजे इण्डिगो एअरलाइन्सको उडानमा नयाँ दिल्ली जाने कार्यक्रम रहेको बताइएको छ ।