नयाँ मन्त्रीलाई बिदेशीसङ्ग बोल्दाबोल्दै भ्याईनभ्याई

आफूले खोजेको मन्त्रालय रवि लामिछानेले हात पारेपछि परराष्ट्रको जिम्मा लिनुभएका उपप्रधानमन्त्री नारायणकाजी श्रेष्ठले यहाँस्थित विभिन्न मुलुकका राजदूतहरुसँगको भेटघाटलाई आज पनि निरन्तरता दिनुभएको छ । 

गृहबाट परराष्ट्र सरेपछि राजदूतहरुसँगको भेटवार्तालाई व्यापक बनाउनुभएका उहाँले आजै दुई देशका राजदूतसँग छुट्टाछुट्टै भेटवार्ता गर्नुभयो । 

बिहानै नर्वेका राजदूत तोरुण द्रमदलाई भेट्नु भएका उहाँले लगत्तै पाकिस्तानी राजदूत अब्रार हास्मीसँग भेट गर्नुभयो । सिंहदरबारस्थित परराष्ट्र मन्त्रालयमा भएको दुबै भेटलाई शिष्टाचार भेटवार्ता भनिएको छ । 

परराष्ट्रमन्त्रीको शपथ ग्रहणलगत्तै गत बिहीबार चिनियाँ र भारतीय राजदूतले उपप्रधानमन्त्री श्रेष्ठसँग छुट्टाछुट्टै भेट गरेका थिए । अर्को दिन दिउँसो अमेरिकी राजदूत उहाँलाई भेट्न सिंहदरबार पुगे ।

त्यस्तै, फागुन २९ गते परराष्ट्रमन्त्री श्रेष्ठले रुसी राजदूत अलेक्सेइ नोभिकोभसँग भेटवार्ता गर्नुभएको थियो ।