आरजू राणाको बाक्लियो नयाँ दिल्ली आउजाउ

नेपाली काँग्रेसकी नेतृ तथा सभापति शेरबहादुर देउवा पत्नी डा.आरजू राणा  देउवा आज फेरि नयाँ दिल्ली जानुभएको छ । प्रतिनिधि सभा सदस्य राणा भिस्तारा एअरलाइन्सको उडान नम्बर युके १५६ बाट अपरान्ह ५ बजे त्यसतर्फ प्रस्थान गर्नुभएको हो ।

उहाँ यसअघि फागुन १७ गते नेपाल वायुसेवा निगमको उडान नम्बर आरए २१७ मा त्यता जानुभएको थियो । राणा नयाँ दिल्लीमा रहेकै बखत २२ गते दिउँसो यता सत्ता गठबन्धन परिवर्तन भएकाले नेपाली काँग्रेस प्रमुख प्रतिपक्षीको भूमिकामा पुगेको थियो । उहाँ सोही साँझ नेपाल वायुसेवाको उडान नम्बर आरए २१८ बाट काठमाडौं आउनुभयो ।

उताबाट फर्केको १२ औं दिन आज फेरि नयाँ दिल्ली जानुलाई राजनीतिक वृत्तमा अर्थपूर्ण ठानिएको छ । प्रधानमन्त्री पुष्पकमल दाहालले अस्ति प्रतिनिधि सभाको बैठकबाट विश्वासको मतसमेत लिइसक्नुभएको छ । 

आजको बैठकमा काँग्रेस सांसदहरुले गृहमन्त्री रवि लामिछानेमाथि नैतिकताको प्रश्न उठाएर विरोध गरेपछि १५ मीनेटका लागि स्थगित गरिएको बैठक पर्सि आइतबार बिहानसम्मको लागि रोकिएको छ ।