सभामुखका कारण संसद रोकिएको सत्तापक्षीय सांसदको आरोप

सत्तारुढ जनता समाजवादी पार्टी (जसपा)का सांसद राजकिशोर यादवले सभामुख देवराज घिमिरेको त्रुटीका कारण संसद बैठक चल्न नसकेको बताएका छन् । 

आज प्रतिनिधि सभाको बैठकपछि सञ्चारकर्मीसँग कुराकानी गर्दै उनले संसद बैठकमा सभामुख घिमिरेको त्रुटी गरेको आरोप लगाए । संसदमा विपक्षीहरुको कुरा सुन्ने वातावरण बनाउनुपर्ने भन्दै उनले प्रमुख प्रतिपक्षका सांसद बोलिसकेपछि सत्ता पक्षका सांसदलाई बोल्न दिनुले वातावरण बिथोलिएको दाबी गरे । 

'अहिले संसदमा जुन परिदृश्य देखापर्यो, सभामुखले यो परिस्थितिलाई मुकाविला गर्नका लागि सर्वपक्षीय, सर्वदलीय सहमतिको वातावरण बनाउनुपर्थ्यो । प्रमुख प्रतिपक्षले संसदमा कुरा राखिसकेपछि उहाँले अरुलाई बिचमा बोल्ने अवसर दिनु हुँदैन थियो जस्तो मलाई लाग्छ', यादवले भने, 'उहाँ (सभामुख)ले अर्कोलाई पनि समय दिनुभयो । एकप्रकारको टसल भयो । संसदमा विपक्षीको कुरा सुन्ने, वातावरण बनाउने भन्ने हुन्छ ।'

संसदमा 'साढे जुधाई' भएको टिप्पणी गर्दै उनले यस्ता गतिविधिले संसदको गरिमा घटाउने चिन्तासमेत व्यक्त गरेका छन् । लोकतन्त्रमा जवाफदेहिता सबैभन्दा ठूलो विषय भएकाले कसैप्रति प्रश्न उठेमा त्यसको जवाफ दिनुपर्ने सांसद यादवको भनाई छ ।

'यहाँ त साढे जुधाई भयो । यसले संसदको गरिमालाई घटाउँछ ।  जनतामा जुन प्रकारको निराशा, आक्रोश छ दलहरुप्रति झन यसले अविश्वासको वातावरण बनाउँछ । सदनको नेता सभामुख हो । उहाँ यसप्रति गम्भिर हुनुपर्छ । आज उहाँबाट कहीँ न कहीँ त्रुटी भएको देखिन्छ । उहाँले अधिकतम दलहरुका बीचमा सहमती गराउने प्रयास गर्नुपर्छ’, उनले भने । 

सहकारी ठगी प्रकरणमा मुछिएका गृहमन्त्री रवि लामिछानेमाथि छानविन गर्न संसदीय समिति गठनको माग गर्दै आएको प्रमुख प्रतिपक्ष नेपाली कांग्रेस आज संसद बैठक अवरोध गरेको थियो । त्यसपछि सहमति जुटाउन भन्दै १५ मिनेटको लागि स्थगित गरिएको बैठक पुन: बस्न सकेन । 

आज सूचना टाँसेर स्थगित गरिएको बैठक भोलिका लागि बोलाएको छ ।