स्वस्तिमाको निर्माता अनुभव- पहिलो पाइला असाध्यै गह्रौँ हुँदोरहेछ !

म्युजिक भिडियो हुँदै चलचित्रमा डेब्यु गरेकी स्वस्तिमा खड्का अहिलेको सर्वाधिक व्यस्त अभिनेत्री हुन् । दर्जनौँ  हिट चलचित्रमा मुख्य भूमिका निभाएकी उनको लोकप्रियता उचाईमा छ ।

सफल कलाकारको रुपमा स्थापित भैसकेकी स्वस्तिमा अब भने सफल निर्माता बन्ने दौडमा छिन् । पहिलो पटक उनले लगानी गरेको चलचित्र 'बेहुली फर्म मेघौली' यतिबेला चर्चामा छ । 

चितवनमा करिब ३४ दिनको शुटिङ सकाएपछि स्वस्तिमाले आज सामाजिक सञ्जालमा एउटा भावुक स्टाटस लेख्दै निर्मात्रीको मनोभाव प्रकट गरेकी छन् । 

शुटिङको क्रममा सहयोग गर्ने सबैलाई दिएकी उनले लेखेकी छन्, 'नयाँ यात्रामा पहिलो पाइला चाल्नुअघि असंख्य प्रश्नले घेर्छन्, सफलता र असफलताको बोझले पहिलो पाइला असाध्यै गह्रौं हुँदोरहेछ । तर, जब पाइलाले गति लिन्छ, ती सबै बोझहरू हलुका लाग्न थाल्छन् ।'  

यो चलचित्रको मुख्य भूमिकामा स्वस्तिमा आफैँ छिन् भने उनका श्रीमान निश्चल बस्नेतले स्क्रीन शेयर गरेका छन् । 

'बेहुली फ्रम मेघौली'को शुटिङमा जानुअघि स्वस्तिमाले पत्रकारहरुसँग ठट्यौली शैलीमा भनेकी थिइन्, 'कलाकार हुँदा मोबाइलमा पैसा जम्मा भएको नोटिफिकेशन आउथ्यो, तर निर्माता बनेपछि बैंक खाताबाट पैसा काटेको मेसेज मात्र आउदो रहेछ!'