कोशीका मुख्यमन्त्रीलाई नेकपा एसले विस्वासको मत नदिने, सुदूरपश्चिममा शुक्रबारभित्र लिनैपर्ने

कोशी प्रदेशका मुख्यमन्त्री हिक्मतकुमार कार्कीले आज विश्वासको मत लिन लागेका छन् । प्रदेशसभा कार्य व्यवस्था परामर्श समितिको हिजोको बैठकले आजको प्रदेशसभा बैठकमा मुख्यमन्त्री कार्कीले विश्वासको मतको प्रस्ताव प्रस्तुत गर्ने निर्णय भएको थियो ।
 

कार्की गत बिहीबार कोशीको मुख्यमन्त्री नियुक्त भएका हुन् । चार जना प्रदेशसभा सदस्य रहेको नेकपा एकीकृत समाजवादीले विश्वासको मतको प्रक्रियामा सहभागी नहुने जनाएको छ । राप्रपाले पनि आज दिउँसो मात्रै निर्णय गर्ने भनिएको छ ।

प्रदेशसभामा एमालेका ४०, माओवादी केन्द्रका १३ र जसपाका एक जना प्रदेश सभा सदस्य छन् । बहुमतका लागि ४७ सदस्यको समर्थन आवश्यक हुन्छ ।

उता सुदूरपश्चिमका मुख्यमन्त्री दीर्घबहादुर सोडारीले आगामी शुक्रबारसम्म विश्वासको मत लिनैपर्ने अवस्था छ । उनी पनि तेस्रो पटक विश्वासको मत माग्ने तयारीमा छन् । सोडारीले प्रधानमन्त्री पुष्पकमल दाहाल प्रचण्डसँगको भेटघाटपछि आगामी बिहीबार विश्वासको मत लिने तयारी गरेका छन् ।

यसअघि मुख्यमन्त्री सोडारीले वैशाख २१ र २२ गते विश्वासको मत लिने तयारी गरेका थिए । एमालेले विश्वासको मत नदिने अडान लिएपछि बैठक अनिश्चित समयका लागि स्थगित गरिएको थियो । एमालेले अझै विश्वासको मतबारे निर्णय गरिसकेको छैन ।