बिमस्टेकका महासचिव बिहानैदेखि सिंहदरबारमा व्यस्त

बहुक्षेत्रीय प्राविधिक तथा आर्थिक सहयोगका लागि बङ्गालको खाडीको प्रयास (बिमस्टेटक) का महासचिव इन्द्रमणि पाण्डे भेटघाटका लागि आज बिहान सिंहदरबार पुगे । नेपालको चार दिने भ्रमणमा श्रीमती सुषमा पाण्डेसहित हिजो बंगलादेशको राजधानी ढाकाबाट काठमाडौं आएका उनी सरकारी अधिकारीहरुसँगको भेटका लागि बिहान १० बजे सिंहदरबार गएका हुन् ।

पाण्डेले सबैभन्दा पहिले परराष्ट्र मन्त्रालयका सचिव सेवा लम्सालसँग भेटवार्ता गरेको बताइन्छ । बिमस्टेक महासचिव र सचिव लम्सालबीच बिहान सवा १० बजेदेखि झण्डै एक घण्टा परराष्ट्र मन्त्रालयमा शिष्टाचार भेटवार्ता भएको हो ।

त्यसपछि उनी गृहसचिव एक नारायण अर्यालसँग भेटवार्ताको निम्ति गृह मन्त्रालय पुगेका थिए । पाण्डे र अर्यालबीच गृह मन्त्रालयमा करिब २० मीनेट कुराकानी भएको हो ।

गृहबाट निस्केपछि महासचिव पाण्डे ऊर्जा मन्त्रालय पुगे । पौने १२ बजेदेखि झण्डै आधा घण्टा ऊर्जा मन्त्रालयका सचिव सुशिलचन्द्र तिवारीसँग कुराकानी गरेपछि उनी सिंहदरबारबाट बाहिरिएका हुन् ।

पाण्डे दम्पती विमान बंगलादेशको उडान नम्बर बीजी ३७१ मा ढाकाबाट हिजो बिहान साढे ११ बजे काठमाडौं आएका हुन् । सचिवालयका निर्देशक किरण शाक्य पनि महासचिवको टोलीमा छन् । 

महासचिवको टोलीको होटल सोल्टीमा बसेको छ । नेपाल भ्रमणपछि उनी पर्सि साँझ ५ बजे भिस्तारा एअरको उडान नम्बर युके १५६ मा नयाँ दिल्ली जाने कार्यक्रम छ ।