प्रधानमन्त्री र देउवाबीच बूढानिलकण्ठमा 'वान टु वान' वार्ता, रविको नाममा कुरो अड्कियो

प्रमुख प्रतिपक्ष दल नेपाली कांग्रेसले सहकारी ठगी प्रकरणमा गृहमन्त्री रवि लामिछानेको नाम किटान गरेर संसदीय छानविन समिति गठन गर्नुपर्ने बताएको छ ।  

प्रधानमन्त्री पुष्पकमल दाहाल प्रचण्ड र कांग्रेस सभापति शेरबहादुर देउवाबीच आज बिहान भएको छलफलमा काँग्रेसले उक्त अडान नछोडेको स्पस्ट पारेको हो । कांग्रेस सहमहामन्त्री जीवन परियारले सहकारीको रकम अपचलन सम्बन्धी विषयमा गृहमन्त्री लामिछानेको नाम नै किटान गरेर जानुपर्ने आफूहरुको अडान प्रधानमन्त्री समक्ष राखेको जानकारी दिए । 

देउवासँगको छलफलमा प्रधानमन्त्रीले सहकारी समस्या समाधान गर्न गोरखा मिडिया नेटवर्कको नाम उल्लेख गरेपछि व्यक्तिको नाम राखिरहन आवश्यक नभएकाले सहमतिमा आउन आग्रह गरेका थिए । तर, कांग्रेसले त्यसलाई अस्वीकार गरेको उनले बताए । 

‘गोरखा मिडिया नेटवर्कको नाम मात्र लिएर पुग्दैन । कम्तीमा त्यहाँ संलग्न व्यक्तिहरू को को हुन् भन्ने पनि उल्लेख नगरी छानबिन अगाडी बढ्न सक्दैन भन्ने हाम्रो अहिलेसम्मको अडान यथावत् छ’, परियारको भनाइ छ । 

सहकारी प्रकरणबारे छानबिन समिति गठन गर्न र अहिलेको गतिरोध हटाउन प्रधानमन्त्री सकारात्मक देखिएको बताउँदै उनले आज साँझ वा भोलि बिहान शीर्ष नेताहरु बसेर निस्कर्षमा पुग्ने विश्वास व्यक्त गरे ।

देउवा भेट्न प्रधानमन्त्री प्रचण्ड आज बिहान बूढानीलकण्ठ पुगेका थिए । प्रधानमन्त्री र देउवाबीच 'वान टु वान' वार्ता समेत भएको थियो । तर, त्यसबारे देउवाले पार्टीका अन्य नेताहरुलाई केही नबताएको परियारले जानकारी दिए ।