गिरीबन्धु बेचेर खान नपाएपछि कांग्रेसले 'स्यालहुँइया' मच्याएको एमाले अध्यक्षको आरोप

नेकपा एमालेका अध्यक्ष केपी शर्मा ओलीले प्रतिपक्ष नेपाली कांग्रेसको चर्को आलोचना गर्नुभएको छ । आफ्नो पार्टीले देशका लागि काम गरिरहँदा काँग्रेसले अवरोध गरेर 'स्यालहुँइया' मच्याएको भन्दै उहाँ आक्रमक हुनुभएको हो । 

आज भक्तपुरमा आयोजित एक कार्यक्रममा अध्यक्ष ओलीले राम्रा काम गर्न नदिन कांग्रेसले अनर्गल प्रचार गरिरहेको आरोप लगाउनुभयो । गिरीबन्धु प्रकरणमा काँग्रेसले आफूविरुद्ध गलत प्रचार गरेको भन्दै उहाँले वैचारिक संघर्ष गर्न नसकेपछि एमालेमाथि प्रहार गरेको दाबीसमेत गर्नुभयो । 

एमालेविरुद्ध शृंखलावद्ध दुष्प्रचार भैरहेको जनाउँदै ओलीले सोध्नुभयो, 'पशुपतिमा एक सय ८ केजी सुन भनेर पित्तल चढायो केपी ओलीले छानबिन गरी पाउँ भनेर कराए । जलाहरी भत्काएर, तौलिएर, सुन हो की होइन घोटेर उधुम गरे । सुनै चढाएको रहेछ । कहाँ गयो त्यो कराउने अहिले ? १०८ केजी सुनवाला कहाँ गयो त्यो  ? अर्को करायो एउटा- कम्बोडियामा तीन हजार करोड लगेर टेलिकममा राखेको छ रे । कहाँ गयो त्यो अचेल ? फिर्ता ल्याए भयो नि त्यो पैसा !  उनीहरुको सरकार थियो, अस्तिसम्म । किन ल्याएन फिर्ता ?

अहिले गिरीबन्धु टि-स्टेटको जग्गाको विषयमा पनि त्यसैगरी अनर्गल प्रचार गरेर आरोप लगाउने काम भैरहेको उहाँको जिकीर छ । अध्यक्ष ओलीले गिरीबन्धुको जग्गा कानुन बनाएर नियमन गर्न खोज्दा आफूमाथि प्रहार भएको बताउनुभयो ।  

'अहिले गिरीबन्धु टि-स्टेट भनेर जानेका छन् । कराएका छन् । गिरीबन्धु टि-स्टेटमा एक पटक ५१ र अर्को पटक १९ बिगाह गरेर ७० बिगाह कानून, नियम बिना बलजफ्ती बिक्री गरेर खाएका थिए । तिनै तत्वहरुले खाएका थिए । गिरीबन्धु टि-स्टेटलाई बेथिति गर्न पाइँदैन भनेर कानून हामीले बनायौँ, कानून बनाएपछि नियम कानूनभित्र बस्नुपर्यो । बेचेर खान नपाइने भयो भनेर स्यालहुँइया मच्चाएका छन्', ओलीको दाबी छ । 

फरक सन्दर्भमा अध्यक्ष ओलीले एमालेभित्र एकताका लागि ठाउँ रहेको तर, विभाजन र गुटबन्दीका लागि कुनै स्थान नभएको प्रष्ट पार्नुभयो ।