काँग्रेस–एमाले समीकरणले चार महिनापछि कोल्टे फेर्ने मेटमणि चौधरीको दाबी

नेकपा एकीकृत समाजवादीका प्रमुख सचेतक मेटमणि चौधरीले चार महिनापछि परिस्थिति प्रधानमन्त्री पुष्पकमल दाहाल प्रचण्डका लागि अनुकूल हुने दाबी गरेका छन् । 

प्रधानमन्त्रीले प्रतिनिधिसभामा राखेको विश्वासको मत सम्बन्धी प्रस्तावको पक्षमा धारणा राख्दै उनले काँग्रेससँगको सम्बन्धलाई सन्तुलनमा राख्न सुझाव दिए । वर्तमान सत्तारुढ गठबन्धन भत्किनुमा काँग्रेस सभापति शेरबहादुर देउवालाई दोष नदिन सांसद चौधरीले प्रधानमन्त्रीलाई आग्रह पनि गरे । 

‘आज परिस्थिति जस्तो भएपनि नेपाली काँग्रेसका सभापतिलाई तपाईं कत्ति पनि दोषी नदेख्नुहोला । उहाँसँगको सम्बन्धलाई सन्तुलनमा राख्नुहोला’, उनले भने, ‘चार महिनामै परिस्थिति अनुकूल भइ त हाल्छ । एकसय प्रतिशत । आजको मितिले चार महिना गनेरै बसौँ ।’

त्यसक्रममा सांसद चौधरीले लोकतान्त्रिक राज्य व्यवस्थालाई कमजोर हुनेगरी संसद विघटनको साक्षी नबस्न देउवालाई पनि सल्लाह दिए । अगाडि रहेका देउवातर्फ हेर्दै उनले भने, ‘म कांग्रेसको सभापतिज्यूलाई पनि हेरिरहेको छु, नेपालको लोकतान्त्रिक राज्य व्यवस्थालाई कमजोर हुनेगरी, संसद विघटन हुनेगरी साक्षी नबस्नु होला । एकसय प्रतिशत त्यो ठाउँमा पुग्छ । चार महिनापछि आजको प्रधानमन्त्रीको जस्तो हालत नहोस् । छल गर्यो मायाले भन्ने गीत गुन्गुनाउनु नपरोस्, बूढानीलकण्ठको निवासमा बसेर ।’

चौधरीले त्यसो भनिरहँदा देउवा भने ‘त्यस्तो हुँदैन’ भन्ने हाउभाउसहित हाँसिरहेका थिए ।  

प्रमुख सचेतक चौधरीले दुई ठूला दल मिल्दा असंवैधानिक काम पनि संवैधानिक हुन्छ ? भनि प्रश्नसमेत गरे । आगामी सरकार संविधानको धारा ७६(३) बमोजिम बन्ने जिकिर गरेका उनले काँग्रेस–एमालेलाई असंवैधानिक काम नगर्न आग्रह गरेका छन् ।