पालिका शोकमा, मेयरसाप योगमा

रुकुमपश्चिमको आठबिसकोट नगरपालिका बाढीपहिरोबाट नागरिकको मृत्यु तथा बेपत्ता भएर शोकमा भए पनि नगरप्रमुख रवि केसी भने भारततिर भ्रमण सँगसँगैै योग ध्यानमा व्यस्त छन् । उनी भारत गएपछि पालिकामार्फत गर्नुपर्नेे विपद् व्यवस्थापनको कामसमेत प्रभावकारी बन्न सकेको छैन । 

केसी हरिद्वारस्थित पतञ्जली योग पीठमा ध्यानतिरै व्यस्त छन् । सँगै पूर्वनगरप्रमुख गोर्खबहादुर केसी सन्देश पनि छन् । केसी माओवादीबाट निर्वाचित मेयर हुन् । नगरपालिकामा बाढीपहिरोबाट चार जना नागरिकको मृत्यु हुनुका साथै अन्य केही बेपत्ता र घाइते भइरहेको अवस्थामा नगर प्रमुखलगायतका व्यक्तिहरूको भारत घुमघामप्रति स्थानीयहरूले चर्को आलोचना गरेका छन् । सामाजिक सञ्जाल फेसबुकमा सन्तोष केसी भन्छन्, ‘पालिकाका नागरिक कस्तो पीडादायी अवस्थामा छन्, बाढी तथा भूकम्प पीडितहरूको राहत उद्धारमा लाग्नुपर्ने बेला के समस्या आइलाग्यो, भारत भ्रमण गर्ने’ उनले लेखेका छन् ।

आठबिसकोटमा बाढीपहिरोबाट विभिन्न ठाउँमा गरी चार जनाको मृत्यु भएको छ भने एक जना बेपत्ता छन् । त्यस्तै, आधा दर्जन बढी नागरिक घाइते भएर उपचाररत हुनका साथै २ सय ५० घरधुरी पहिरोको जोखिममा छन् । 

जिल्लाका सबै पालिका प्रमुखहरूको सहभागितामा यसबीच महत्वपूर्ण जिल्ला विपद् व्यवस्थापन समितिको बैठक बसेको भए पनि नगरप्रमुख केसीको सहभागिता हुन सकेन । बाढी तथा पहिरो पीडितको अवस्था बुझ्न सांसद तथा अन्य नेताको टोलीले अनुगमनसमेत गर्दा पनि आफ्नै नगरप्रमुख भारततिर छन् । राष्ट्रियसभा सदस्य कृष्णबहादुर रोकायले प्रभावित परिवारहरूसँग भेटघाट गर्नुका साथै घटनास्थलको स्थलगत निरीक्षण गरेका छन् । 

(साभार:जनआस्था साप्ताहिकबाट)