एकीकृत समाजवादीका नेताहरू मतदानकाे लाइनमा

नेकपा एकीकृत समाजवादीको पदाधिकारी चयनका लागि तोकिएको मतदान सुरु भएको छ । दिउँसो २ बजे सुरु हुने भनिए पनि ढिलो थालिएको जानकारी दिइएको छ ।

पार्टीमा अध्यक्ष, वरिष्ठ उपाध्यक्ष, उपाध्यक्ष, महासचिव, उपमहासचिव, सचिव र कोषाध्यक्षसहित १८ सदस्यीय पदाधिकारीको व्यवस्था छ । महाधिवेशनको बन्दसत्रबाट अध्यक्षमा माधवकुमार नेपाल, सम्मानित नेतामा झलनाथ खनाल र महासचिवमा घनश्याम भुसान चयन भइसक्नुभएको छ । अन्य पदाधिकारी टुंगो लगाउन सकस भएपछि डेढ महिनापछि आज मतदान गरिएको हो । 

वरिष्ठ उपाध्यक्षमा घनेन्द्र बस्नेत र राजेन्द्रप्रसाद पाण्डेले उम्मेदवारी दिएपनि बस्नेतले उम्मेदवारी फिर्ता लिएपछि पाण्डे निर्विरोध हुनुभएको छ । सात जना उपाध्यक्षका लागि १६ जनाको उम्मेदवारी परेको छ । 

महिला उपाध्यक्षमा जयन्ती राई र रामकुमारी झाक्रीको प्रतिस्पर्धा छ । जारी मतदान सकिएलगत्तै मतगणना थालिने छ ।