धोबीखोला करिडोरमा युवा संघको सुविधा सम्पन्न कार्यालय

नेकपा एमालेको भ्रातृ संगठन राष्ट्रिय युवा संघको केन्द्रीय कार्यालय सरेको छ । काठमाडौंको बानेश्वरस्थित रहेको कार्यालय धोबीखोला करिडोरस्थित नवनिर्मित सुविधासम्पन्न भवनमा सारिएको बताइएको छ ।

युएन पार्कको वारिपट्टी रहेको भवनको सबैभन्दा माथिल्लो तल्लामा कार्यालय सारिएको छ । उक्त तल्लामा एक हलसहित पाँच कोठा छन् । उक्त फ्ल्याटको मासिक भाडा ७० हजार रुपैयाँ तिर्ने सहमति भएको बताइन्छ । 

युवा संघका प्रवक्ता निरज पौडेलले कार्यालय सारेको केही दिन मात्रै भएको जानकारी दिए । कार्यालय अर्को भवनमा सारिए पनि युवा संघद्वारा आयोजित कार्यक्रमहरु पुरानै भवनमा हुने उनले बताए ।