रविको पक्षमा सडक विलाप नगर्न कांग्रेस नेताको सुझाव

नेपाली कांग्रेसका महामन्त्री विश्वप्रकाश शर्माले राष्ट्रिय स्वतन्त्र पार्टी (रास्वपा)का कार्यकर्तालाई रुवावासी नगर्न सुझाव दिएका छन् । 

सहकारी ठगीमा पक्राउ परेका सो पार्टीका सभापति रवि लामिछानेको पक्षमा भैरहेको सडक प्रदर्शनप्रति लक्षित गर्दै उनको यस्तो प्रतिक्रिया आएको हो । महामन्त्री शर्माले रास्वपाका कार्यकर्तालाई सडक विलापको जगहँसाई नगर्न सुझाए । 

‘कांग्रेसका दुई–चार, एमालेका दुई–चार, माओवादी, राप्रपा र रास्वपाका दुई–चार मान्छे सहकारी ठगीमा जेल पर्ने भए भनेर रुवावासी नगरौं’, उनले भनेका छन्, ‘अनुसन्धानलाई सघाऔं, अदालतको फैसला कुरौं । सडक विलापको जगहँसाई नगरौं ।’

रास्वपाका कार्यकर्ताले लामिछानेको पक्राउलाई राजनीतिक प्रतिशोध भनेर संसदकै अपमान गरेको शर्माको तर्क छ । ‘रास्वपाकै प्रतिनिधिले पनि हस्ताक्षर गरेको प्रतिवेदन भन्छ-,प्रचलित कानुन बमोजिम कार्वाही गर्नु, तर प्रक्रिया शुरु भएपछि– ‘राजनैतिक प्रतिशोध’ भन्नु संसदीय समिति र संसदकै अपमान होइन र ?’ उनको प्रश्न छ । 

सहकारी ठगीका दोषीलाई कारबाही र बचतकर्ताको रकम फिर्ता आजको राष्ट्रिय आवश्यकता भएको शर्माको भनाई छ ।