नाम एनआरएन एक, आज बेलुकीको भात भान्छा अनेक
तीन चिरामा विभक्त गैरआवासीय नेपाली संघ (एनआरएनए) को एउटा समूहले आयोजना गरेको कार्यक्रममा प्रधानमन्त्री केपी शर्मा ओली सहभागी भएपछि विवाद थप चर्किएको छ ।
एमाले समर्थित बद्रि केसी पक्षले आज काठमाडौँमा आयोजना गरेको 'ग्लोबल सम्मेलन' मा प्रधानमन्त्रीको उपस्थिति रहेको हो । कार्यक्रममा गृहमन्त्री रमेश लेखक,युवा तथा खेलकुदमन्त्री तेजुलाल चौधरी, पर्यटनमन्त्री बद्री पाण्डे,उपसभामुख इन्दिरा रानालगायत सरकारका विशिष्ट व्यक्तिहरूको सहभागिता रहेको छ ।
तर, प्रधानमन्त्रीको उपस्थितिलाई लिएर अरु दुई समूहले भने चर्को आपत्ति जनाएका छन् । माओवादी समर्थक भनिएका र संघको गत निर्वाचनमा अध्यक्षको उम्मेदवार रहेका आरके शर्मा पक्षधरले सार्वजनिकरुपमै विरोध जनाएको छ । शर्मा पक्षका उपाध्यक्ष गंगाधर गौतमले यसअघि नै सम्मेलन बहिष्कारको अपिल गरेका थिए ।
नयाँ नेतृत्व चयनका लागि गत वर्ष भएको निर्वाचनमा बिजेता घोषित बद्रि केसी समूह र अध्यक्षका दुई प्रत्यासी आरके शर्मा र कांग्रेस निकट महेश श्रेष्ठको छुट्टाछुट्टै समूह छ । केसीले अनलाइन भोटिङ प्रणाली कब्जामा लिई नेतृत्व हात पारेको आरोप लगाउँदै शर्मा र श्रेष्ठले परिणाम अस्वीकार गरेपछि उत्पन्न विवाद सर्वोच्च अदालतसम्म पुगेको छ ।
सर्वोच्चले पछिल्लो समय केसी पक्षलाई काम गर्न बाटो खुला गरेपछि शर्माले अर्को रिट दर्ता गराएसङ्गै विवाद थप पेचिलो बन्दै गएको छ । उक्त रिट सर्वोच्चमा विचाराधीन रहेको अवस्थामा प्रधानमन्त्री ओली एउटा पक्षको कार्यक्रममा उपस्थित भएकोप्रति केहीले अप्ठेरो मानेको अवस्था छ ।
एमालेसँगको आवद्धता र प्रधानमन्त्री ओलीसंगको विशेष सम्बन्धका आधारमा केसीले आफ्नो खेमालाई आधिकारिक देखाउन सरकारका मान्छे कार्यक्रममा उपस्थित गराएको असन्तुष्टहरुको दाबी छ । उनीहरुले कार्यक्रमलाई एमालेनिकट एनआरएनए भेलाको संज्ञासमेत दिएका छन् ।
तीनवटै समूहले आज बेलुका आफू निकटहरुलाई छुट्टै खानपानको कार्यक्रम राखेको बुझिएको छ ।
टिप्पणीहरू