रुकुमबाट छुटेको बस बागलुङमा पल्टियो

रुकुम पूर्वबाट काठमाडौँका लागि छुटेको यात्रुवाहक बस बागलुङमा दुर्घटनामा परेको छ । ना.८ ख ८४१४ नम्बरको बस आज अपरान्ह निसीखोला गाउँपालिका–६, जाहुलपानीमा पल्टिएको छ ।

बसका ४५ जना यात्रुमध्ये केही घाइते भएको बताइएको छ । तीमध्ये गम्भीर घाइते २१ जनाको बुर्तिबाङ स्वास्थ्य केन्द्रमा उपचार भइरहेको जिल्ला प्रहरी कार्यालय बागलुङका एसपी ऋषिराम कँडेलले जानकारी दिए । 

उद्धार कार्य जारी रहेकाले घाइतेको संख्या र अवस्थाबारे प्रष्ट जानकारी आइनसकेको उनले बताए । दुर्घटनाबारे अनुसन्धान भइरहेको प्रहरीले जनाएको छ ।