कम्युनिष्ट अफ रसिया पार्टीका अध्यक्ष र छविलाल जोशी एउटै उडानमा

नेपाल भ्रमणमा रहेका कम्युनिष्ट अफ रसिया पार्टीका अध्यक्ष तथा सभासद सेरगई अलेक्जेन्डेभिच मालिन्कोभिच पोखराबाट काठमाडौं फर्केका छन् । तीन सदस्यीय टोलीको नेतृत्व गर्दै नेपाल आएका उनी आज साँझ साढे ६ बजे यति एअरलाइन्सको उडान नम्बर वाइटी ६८२ मा पोखराबाट आएका हुन् ।

सोही उडानमा दुई महिनादेखि कास्की प्रहरीको हिरासतमा रहेका नेपाल प्रहरीका पूर्व डिआईजी छविलाल जोशीलाई पनि काठमाडौं ल्याइएको छ । सहकारी ठगी, संगठित अपराध र सम्पत्ति शुद्धीकरणको आरोपमा अनुसन्धान भइरहेका उनलाई बयानको निम्ति पोखराबाट केही दिनका लागि तिहारअघि रुपन्देही पुर्याइएको थियो । काठमाडौंमा पनि सहकारी ठगीको उजुरीपछि अनुसन्धानका लागि आज पोखराबाट ल्याइएको हो । 

सोही आरोपमा राष्ट्रिय स्वतन्त्र पार्टीका सभापति तथा पूर्व गृहमन्त्री रवि लामिछाने पनि एक महिनादेखि कास्की प्रहरीको हिरासतमा छन् । उनलाई पनि अघिल्लो साता तीन दिन भैरहवा पुर्याएर बयान लिइएको थियो ।