रास्वपा बैठक कार्यवाहक सभापतिको अध्यक्षतामा बस्दै

राष्ट्रिय स्वतन्त्र पार्टी (रास्वपा) को सचिवालय बैठक डाकिएको छ । पार्टी मुख्यालय वनस्थलीमा दिउँसो ३ बजे राखिएको बैठक कार्यवाहक सभापति डिपी अर्यालको अध्यक्षतामा बस्न लागेको हो ।

आजको बैठकले समसामयिक राजनीतिबारे छलफल गर्ने बताइएको छ । त्यसैगरी केन्द्रीय विभागमा सदस्यहरुको मनोनयन, आगामी केन्द्रीय समितिको बैठकको तयारी लगायत विषयमा छलफल र निर्णय गर्न लागिएको एक जना सदस्यले बताए ।

सभापति रवि लामिछानेविरुद्ध सहकारी ठगी, संगठित अपराध र सम्पत्ति शुद्धीकरण मुद्दा लागेपछि उपसभापति अर्याललाई पछिल्लो बैठकले कार्यवाहकको जिम्मेवारी दिएको हो । लामिछाने गत कात्तिक २ गतेदेखि कास्की प्रहरीको हिरासतमा छन् ।