बालिकाको गोप्य अंग छोएका पास्टरविरुद्ध उजुरी

येशुले मुक्ति दिनुहुन्छ भन्दै बालिकाहरुको गोप्य अंग छुने गरेका एकजना पास्टरविरुद्ध जिल्ला प्रशासन कार्यालय, सुनसरीमा उजुरी परेको छ । पीडित दुई बालिकाले धरानस्थित होसना बापटिस चर्चका पास्टर डेबिड लिम्बू (नाम परिवर्तन)विरुद्ध उजुरी दिएका हुन् । 

पुष १० गते क्रिसमस मनाउने क्रममा पास्टर लिम्बूले आफूहरुको गोप्य अंग छोएको र नांगो भिडियो बनाएर सामाजिक सञ्जालमा पोस्ट गरेको बालिकाहरुको आरोप छ । ‘नाटक देखाउने क्रममा बगैँचामा डुल्नेबेलामा नांगै डुल्नु भनेर हामीले नमान्दा नमान्दै जबर्जस्ती कपडा खोल्न लगाइयो’, उजुरीमा भनिएको छ, ‘नाटकको तयारी थाल्दा एक्लै कोठमा जबर्जस्ती गर्ने, शरीर छाम्ने, गोप्य अंग छुने र धेरै पटक यसो नगर्नु भन्दा येशुले तिमीहरुलाई मुक्ति दिनुहुन्छ भनेर फर्काइयो ।’

पास्टर लिम्बूले बालिकाहरुको नांगो भिडियो पोर्न साइटमा समेत राखेको र आफन्त तथा परिवारलाई पठाइदिएको पनि उजुरीमा उल्लेख छ । उक्त भिडियोको कारण मानसिक यातना भएको भन्दै बालिकाहरुले थप भनेका छन्, ‘भिडियो साथी र परिवारलाई पठाएर हामीलाई ज्यादै मानसिक तनाब भएको छ । पढ्न, निदाउन र खानपिन गर्न पनि समस्या भएको छ । हाम्रो भिडियो पोर्नसाइटमा राखेर पनि बेइज्जत गरिएको छ ।’

बालिकाहरुले पास्टरलाई तत्काल कारवाहीको दायरमा ल्याउन माग गरेका छन् । त्यस्तै, उनीहरुले मानव अधिकार आयोगको प्रदेश कार्यालय र महिला आयोगमा पनि उजुरी दिएको बताएका छन् ।