पत्नीलाई ‘मान्य’ बनाउने रविको यस्तो प्लान

पूर्वगृहमन्त्री तथा राष्ट्रिय स्वतन्त्र पार्टी (रास्वपा) का सभापति रवि लामिछानेले पत्नी निकिता पौडेल लामिछानेलाई ‘माननीय’ बनाउने तयारी गरेको विस्तृत विवरण फेला परेको छ ।

सहकारी ठगी, संगठित अपराध र सम्पत्ति शुद्धीकरणको मुद्दा लागेका उनले ०८४ सालको संसदीय निर्वाचनमा श्रीमतीलाई बाजुराबाट प्रत्यक्ष उम्मेदवार बनाउने र त्यहाँको भोट तान्ने तारतम्य मिलाएको खुलेको हो । बाजुरा पुगेर ‘नारी टिभी’ उद्घाटन गर्नु त्यही अभियानको एउटा चरण थियो । रोचक प्रसंग त के भने, सो टिभीको धेरैजस्तो कार्यक्रम उत्पादन बाजुरामै हुने गरी सूचना तथा प्रशारण विभागमा दर्ता गरिएको छ । निकिता सिइओ रहेको नारी टिभी मनोरञ्जनसम्बन्धी च्यानल ‘टिभी फिल्मी’ को साटो सञ्चालन गरिएको हो । १३३ औं नारी दिवसको अवसर पारेर घोषणा गरिएको टेलिभिजनले महिलाको आवाज उठाउने भनिएको थियो । 

२०७९ मंसिर ४ गतेको प्रतिनिधि तथा प्रदेशसभा निर्वाचनमा चितवनबाट रवि निर्वाचित भएपछि निकिताको बाजुरा आउजाउ बढ्यो । उनी चुनावलगत्तै पनि सदरमुकाम कोल्टी पुगेकी थिइन् । दुर्गम भेगका महिलासँग फोटो खिचाउँदै सामाजिक सञ्जालमा वाहवाही बटुलेकी उनले टेलिभिजनको उद्घाटन बाजुराकै एक वृद्ध आमाबाट गराइन् । सारा गाउँलाई उपस्थित गराएर रवि र निकिताले बूढीगंगाकी ८४ वर्षीय नन्दा साउदको हातबाट द्वीप प्रज्वलन गराए । त्यसपछि औपचारिक तवरबाट सञ्चालनमा आएको सो टेलिभिजनले बाजुराका स्टोरीलाई प्राथमिकतामा राख्दै गएको देखिन्छ । बाजुरावासीका समस्या उजागर गरेको देखाएर निकिताले आफू संसदमा छिर्न खुड्किलो बनाएको यसबाट प्रष्ट हुन्छ । स्रोतका अनुसार रविको टिमले बाजुरामा केही सामाजिक काम गरेर निकिताको ‘इमेज’ राम्रो बनाउन खोजेको पाइएको छ । अन्यथा आमा, न बाबु– कतैबाट पनि रवि र निकिताको बाजुरासँग साइनो देखिन्न ।  

बाजुरालाई केन्द्रविन्दुमा राखिए पनि नारी टिभी काठमाडौंको नागपोखरीबाट सञ्चालित छ । शुरुवातदेखि नै सोही स्थानबाट कार्यक्रम प्रशारण भइरहेको छ । दर्ता गर्दा जुन स्थान राखिएको हुन्छ, त्यही स्थानबाट मिडिया चलाउनुपर्ने बताउँछन्, विभागका निर्देशक एवं सूचना अधिकारी मिनकुमार शर्मा । 

‘दर्ता गर्दा जुन जिल्ला ठेगाना राखेको छ, त्यहीँ कार्यालय हुनुपर्छ । कार्यालय सार्नु परेमा विभागलाई जानकारी गराउनुपर्छ । यहाँबाट ठाउँ सारी गरेपछि मात्रै कार्यालय सार्न सकिन्छ’, उनले भने । रवि माननीय बनेपछि सञ्चालनमा आएको नारी टिभीमा सहकारी ठगीको आरोपमा फरार गितेन्द्रबाबु उर्फ जिबी राईको अदृश्य लगानी छ ।

जिबी सञ्चालक रहेको ग्यालेक्सी फोर–के टेलिभिजनको नाममा भुक्तानी लिँदै उनीहरूले पैसा नारीमा लगेर खन्याएको देखिन्छ । स्रोतका अनुसार जिबीले ग्यालेक्सीको नाममा छुट्याएको रकम नारीमा पनि जाने गरेको थियो । स्रोत भन्छ, ‘जिबी ग्यालेक्सीलाई थप राम्रो बनाउनका लागि बचतकर्ताको पैसा ल्याएर त्यहाँ हाल्थे । रविले चाहिँ आफ्नो त्यसरी गरिएको लगानी  सट्याकसुटुक पारेर उता लैजान्थे । सरकारी कार्यालयमा दुईटा सामान किन्यो भने पाँच वटाको बिल बन्छ नि ! त्यहाँ पनि त्यस्तै हालत थियो ।’

रविको लहैलहैमा लागेर जिबीले खोलेको ग्यालेक्सी फोर–के टेलिभिजनको नामसमेत आफूखुशी परिवर्तन गरिएको पाइएको छ । ग्यालेक्सी एचडी भनी दर्ता गरिएकोमा उनीहरूले फोर–के बनाएका हुन् । हाल ग्यालेक्सीको प्रशारण बन्द छ । यता, जिबीको प्रत्यक्ष सेयर रहेको मुनलाइट टिभीमा गीत मात्रै बजिरहेको छ । पुरानो बानेश्वरमा कार्यालय रहेको सो टेलिभिजन रास्वपाका तत्कालीन चितवन जिल्ला सभापति धर्मेन्द्र सापकोटाले चलाइरहेका छन् ।