प्रधानमन्त्रीका आर्थिक सल्लाहकारलाई राउन्ड टेबलको निम्तो

राष्ट्रिय आविष्कार केन्द्रका संस्थापक एंव वैज्ञानिक महावीर पुनले प्रधानमन्त्रीका आर्थिक सल्लाहकार डा. युवराज खतिवडालाई राउण्ड टेबलमा बोलाएका छन् । 

खतिवडाले मुलुकको विद्यमान कानुनको अध्ययन नगरी अभिव्यक्ति दिएको भन्दै पुनले स्वच्छ बहसको लागि निम्तो दिएका हुन् । पूर्व अर्थमन्त्रीसमेत रहेका खतिवडाले सोमबार राजधानीमा आयोजित श्रम तथा रोजगार सम्मेलनलाई सम्बोधन गर्दै १० वर्षपछि कोही नेपाली वैदेशिक रोजगारीमा जानु नपर्ने ठोकुवा गरेका थिए । 

उनले दावा गर्दै भनेका थिए, ‘एक दशकपछि वैदेशिक रोजगारमिा जानै नपर्ने अवस्था सिर्जना हुन्छ ।’ पुनले भने अहिलेको अवस्थामा खतिवडाको कुरा कुनै हालतमा पूरा नहुने बताएका छन् । 

‘युवराज खतिवडाज्यूसहित सबै पूर्व अर्थमन्त्रीहरु, अर्थशास्त्रीहरु र योजनाकारहरु आउनुहोस्’, उनले भनेका छन्, ‘तपाईहरु सबैसँग राउन्ड टेबलमा बसेर म स्वच्छ बहस गर्न तयार छु ।’

देशभित्रै रोजगारी सिर्जना गरेर विदेश जानुपर्ने परिस्थितिको अन्त्य गर्न पुनले केही सुझावसमेत दिएका छन् । उनका अनुसार मुलुकको अर्थतन्त्रमा सुधार ल्याउन र रोजगारीको सिर्जना गर्न सरकारले पहिलो कदममा अहिलेको युवा पुस्तालाई अनुसन्धान तथा नवप्रवर्तनको काममा लगाएर उद्यमशिलताको लचिलो नीति ल्याउनुपर्छ । त्यसको लागि सरकारले कुल ग्राहस्थ उत्पादनको कम्तिमा एक प्रतिशत रकम मात्र भए पनि लगानी गर्नुपर्ने पुनको सल्लाह छ । 

‘खोई त त्यतातिर कदम चालेको ? तपाईसहित अरु अर्थमन्त्रीहरु सबैलाई भेटेर मैले यो कुरा राखेको थिएँ’, पुनले थपेका छन्, ‘खोई त, मेरो सुझाव सुनेको ? कृपया मेरो सुझाव सुन्नुहोस् र सोही अनुसार काम गर्नुहोस् । र नेताहरुलाई पनि सम्झाई बुझाई गर्नुहोस् ।’

पुनले अन्त्यमा आक्रोश र रोदनको इमोजीसमेत प्रयोग गरेका छन् ।