वीरगञ्जमा हानाहान, राजधानीका क्याम्पसमा तालाबन्दी
पर्साको वीरगञ्जस्थित ठाकुरराम बहुमुखी क्याम्पसमा स्ववियु निर्वाचनको मतदान भइरहँदा फर्जी मतदान गरेको भन्दै विभिन्न संगठनका विद्यार्थीहरुबीच हानाहानको अवस्था उत्पन्न भएको छ । नेकपा (एमाले) निकट अनेरास्ववियु र नेकपा (माओवादी केन्द्र) निकट अखिल क्रान्तिकारीका विद्यार्थी नेताहरुबीच हात हालाहाल भएको छ ।
अनेरास्ववियु निकट विद्यार्थीहरुले फर्जी भोट खसालेको अखिल (क्रान्तिकारी)को आरोप छ । नेपाली कांग्रेस निकट नेविसंघका विद्यार्थी नेताहरुले पनि क्याम्पसबाहिर नाराबाजी गरिरहेका छन् । वातावरण तनावग्रस्त बनेपछि जिल्ला प्रहरी कार्यालय पर्साका एसपी कुमोद ढुंगेल स्वयम् क्याम्पस पुगेका छन् ।
यता काठमाडौँ उपत्यकाका सात वटा क्याम्पसमा पनि व्यापक प्रहरी परिचालन गरिएको छ । आरआर क्याम्पस, सरस्वती बहुमुखी क्याम्पस र नेपाल ल क्याम्पसको गेटमा अनेरास्ववियुका नेताहरुले विभिन्न मागसहित भोटे ताल्चा लगाएका छन् ।
त्यस्तै त्रिचन्द्र कलेज र पब्लिक युथ क्याम्पसमा नेविसंघले ताल्चा लगाएपछि निर्वाचनको प्रक्रिया अवरुद्ध छ । अखिल (क्रान्तिकारी)ले पनि अमृत साइन्स क्याम्सप र विश्वभाषा क्याम्पसमा ताल्चा लगाएको छ ।
टिप्पणीहरू