श्रीमान्–श्रीमतीबीच टक्कर, के हो चक्कर ?

भनिन्छ, ‘श्रीमान्–श्रीमती एक रथका दुई पांग्रा हुन् ।’ जसरी रथको एउटा पांग्रा तलमाथि भयो भने दुर्घटना हुन्छ, श्रीमान्–श्रीमतीको सम्बन्ध पनि त्यस्तै हो । सम्बन्धलाई बलियो बनाइराख्न दुवैले एकअर्काको कुरा सुन्नुपर्छ, बुझ्नुपर्छ । ‘कम्युनिकेशन ग्याप’ भयो भने तेस्रो व्यक्तिलाई प्रवेश गर्न सजिलो हुन्छ र सम्बन्ध टुक्राटुक्रा बन्न क्षणिक पनि लाग्दैन । 

सँगै जिन्दगी काट्ने वाचा गरेका श्रीमान्–श्रीमती नै एकापसविरुद्ध मैदानमा उत्रिनुपर्ने अवस्था आइलाग्छ । त्यस्तै भएको छ, लमजुङका विष्णुबहादुर बस्नेतलाई । अमेरिका बस्दै आएका उनको एकातिर दाम्पत्य जीवन बर्बाद बनेको छ भने अर्कोतिर मानसिक यातना खेप्नुपरेको छ । श्रीमतीले जिल्ला प्रहरी कार्यालयमा बलात्कारको जाहेरी दिएकी छन् । 

बेसीशहर नगरपालिका–७ का बस्नेत र मस्र्याङ्दी गाउँपालिकाकी सिर्जना भण्डारी २०७३ सालमा वैवाहिक बन्धनमा बाँधिए । दुवै जनाको राजीखुशीमै मागी विवाह भएको थियो । वैवाहिक जीवन सुःखमय नै कटिरहेको थियो । सोही क्रममा बस्नेतलाई डिभी प¥यो । विवाहको केही महिनामै अमेरिका उडे । २०७५ कात्तिकमा घर आएका थिए । 

एक महिना बसेर फर्किए । तबसम्म सम्बन्धमा कुनै उतारचढाव थिएन । त्यसयता भने सम्बन्ध राम्रो छैन । श्रीमान्ले आफूलाई बेवास्ता गरेको, फोन गर्दा गाली गर्ने गरेको सिर्जनाको आरोप छ । उनले विष्णुविरुद्ध सम्बन्धविच्छेद, बहुविवाह, अंशबण्डालगायत मुद्दा दायर गरेकी छन् । पछिल्लोपटक घर आएका श्रीमान्ले आफूलाई जबरजस्ती करणीको प्रयास गरेको भन्दै सिर्जना प्रहरीकहाँ पुगेकी छन् । 

सिर्जनाले श्रीमान्बाट आफू पीडित भएको दाबी गरेकी छन् भने श्रीमतीबाट आफू पीडित भएको विष्णुको ठोकुवा छ । श्रीमान्–श्रीमतीबीच आरोप–प्रत्यारोप चलिरहेको छ । सिर्जनासँग विवाह गर्दा आफ्नो मात्र नभई आमाको समेत जिन्दगी बर्बाद भएको विष्णु बताउँछन् । उनका अनुसार एक जना थापा थरका बैंकका म्यानेजरसँग चिनजान भएपछि सिर्जनाको स्वभावमा पूरै परिवर्तन आएको हो । 

उनी तिनै म्यानेजरको घरमा बस्दै आएको विष्णुको भनाइ छ । भाडा उठाउनका लागि मात्रै घर आउने गरेकी छन् । भन्छन्, ‘राजीखुशीमै विवाह भएको हो । दुई वर्षसम्म सम्बन्ध सुमधुर थियो । उनले आठ कक्षा पढे पनि हामीले ल्याएर १२ सम्म पढायौं । व्याचलर गर भन्दा मानिनन् र व्युटीपार्लर खोलिन् । जे गर्न पनि छुट थियो । म यता भएँ, उनको त्यहाँ थापा थरका एक म्यानेजरसँग चिनजान भएछ । म्यानेजरकी हजुरआमाको माइत सिम्पानी रहेछ । उनी बेसीशहरको एउटा बैंकमा कार्यरत छन् । सिर्जना उनकै घरमा बसिरहेको सुनेको छु ।’

सिर्जनाले सासूमाथि पनि थुप्रै आरोप लगाएकी छन् । सासूले खान नदिएको, कुटपिट गर्ने गरेको सिर्जनाको जाहेरीमा उल्लेख छ तर विष्णुले भने सबै आरोप झुटो भएको बताए । आफ्नी आमाले उनलाई छोरीजसरी राखेको उनको भनाइ छ । आफूले पनि सिर्जनालाई कहिल्यै नराम्रो व्यवहार नगरेको विष्णु बताउँछन् । ‘केटी मान्छे रोएपछि समाजले ऊ नै पीडित हो भन्छ तर पुरुष पनि पीडित हुन्छन् । हाम्रो पीडा कसले देख्ने ? उनले म र ममीमाथि निराधार आरोप लगाएकी छन् । बुवाको दुईटी श्रीमती हुनुहुन्थ्यो । आमामाथि भएको नराम्रो व्यवहार देखेको थिएँ । त्यसैले उनलाई कहिल्यै नराम्रो व्यवहार गरिन । श्रीमान्–श्रीमतीबीच सामान्य नोंकझोंक त भइहाल्छ । उनले हामीमाथि हुँदै नभएको आरोप लगाएकी छन्’, उनले भने ।

मैले  दिदीकहाँ पुगेर बोलाएँ तर डेढ घण्टासम्म आइनन् । त्यसपछि ती म्यानेजरलाई फोन गरेँ, एकछिनमै आइहालिन् । मैले उनलाई छोएको पनि छैन । 

सिर्जनाको भाइलाई समेत आफ्नै घरमा राखेर कक्षा १२ सम्म पढाएको विष्णुको भनाइ छ । भाइले परीक्षा दिएको भोलिपल्टै उनले मुद्दा दायर गरेकी हुन् । सिर्जनाले चार करोड रूपैयाँ ‘बार्गेनिङ्ग’ गरिरहेको विष्णुको आरोप छ । एउटा हातमा जाहेरी लिएर आफू र आमालाई तर्साउने गरेको विष्णुले जनआस्थासँग बताए । सिर्जनाका कारण आफूलाई मानसिक तनाव भएको उल्लेख गर्दै उनले छलफलका लागि बोलाउँदासमेत नआएको जनाए । 

सन् २०१८ यता सिर्जना र आफूबीच शारीरिक सम्बन्ध नभएको विष्णु बताउँछन् । भन्छन्, ‘मैले के हो तिम्रो समस्या, छलफल गरौं भन्दा पनि मान्दिनन् । यसअघि नेपाल आउँदा घर पुगेको थिएँ । म पुग्नेबित्तिकै फुत्त निस्किएर हिँडिन् । कहाँ गइन् थाहा भएन । मैले उनको दिदीकहाँ पुगेर बोलाएँ तर डेढ घण्टासम्म आइनन् । त्यसपछि ती म्यानेजरलाई फोन गरेँ, एकछिनमै आइहालिन् । मैले उनलाई छोएको पनि छैन । राति मेरो घरबाहिर केटाहरू पठाएर घेर्न लगाइन् र म ज्यान बचाउन त्यहाँबाट भागेर हिँडेँ । कि चार करोड दे कि सिध्याइदिन्छु भनेर धम्की मात्र दिन्छिन् । पैसाबाहेक अरु कुरै हुँदैन।’

मानसिक तनावका कारण आफूले मन लगाएर काम गर्न नसकेको विष्णुको गुनासो छ । सिर्जनाले अमेरिकाबाट घिसारेर ल्याउने भन्दै तारन्तार धम्की दिएको उनले बताए । विष्णुको भनाइअनुसार सिर्जनाले घरघडेरीमा आँखा लगाएर बसेकी छन् । यता, सिर्जनाले भने विष्णुले घरमा श्रीमती हुँदाहुँदै अर्की विवाह गरेर अमेरिका लगेको, आफूलाई मानसिक यातना दिएको, घर आउँदा जबरजस्ती करणीको प्रयास गरेको, सुनचाँदी खोस्न खोजेकोलगायत आरोप लगाइन् । 

उनले घर बेच्न लागेकाले आफूले अदालतमा सम्पत्ति रोक्का राखेको सिर्जनाको भनाइ छ । नेपालबाट लगेको कर्जा तिर्न आलटाल गरेको र विष्णु जुवातासमा लिप्त रहेको उनी बताउँछिन् । उनले विष्णुविरुद्ध नेपालस्थित अमेरिकी दूतावाससहित विभिन्न निकायमा उजुरी दिएकी छन् ।