मित्रता दिवस चीनमा धमाधम मनाइँदै

नेपाल र चीनबीच कूटनीतिक सम्बन्ध स्थापनाको ७० औँ वार्षिकोत्सव मनाउने क्रम चीनमा शुरु भएको छ । सिचुआन प्रान्तको राजधानी छन्तुमा सिचुआन–नेपाल संस्कृति,पर्यटन,अर्थतन्त्र र व्यापार आदानप्रदान महिनाको सिचुआन श्रृंखला प्रारम्भ भएको छ । 

सिचुआन प्रान्तीय सरकारको विदेश मामिला कार्यालय र छन्तुस्थित नेपालको महावाणिज्य दूतावासले आयोजना गरेको कार्यक्रममा प्रान्तीय विदेश मामिला कार्यालयका महानिर्देशक झाङ ताओ,बेइजिङस्थित नेपाली राजदूत कृष्णप्रसाद ओलीलगायत विशिष्ट पाहुनाको उपस्थिति थियो । छन्तु र पोखराबीच सोझो हवाई सेवा शुरु भएसङ्गै पारस्परिक आदानप्रदान बढेको बताइएको छ ।

एक महिनासम्म प्रान्तका विभिन्न शहरमा सञ्चालन हुने कार्यक्रमबाट स्थानीय उत्पादनको प्रदर्शनी र सांस्कृतिक आदानप्रदान हुने विश्वास लिइएको छ । यसबाट सांस्कृतिक,व्यापारिक,आर्थिक एवम् जनस्तरको सम्बन्धलाई अझ सुदृढ बनाउने दुबै पक्षका अधिकारीहरु बताउँछन् ।