१५ गतेका लागि एमालेको व्यापक तयारी, मान्छे जुटाउन नेताहरुलाई जिम्मेवारी

नेकपा एमालेले जेठ १५ गते राजधानीमा गर्न लागेको प्रदर्शनमा व्यापक उपस्थितिका लागि तयारी गरेको छ । गणतन्त्र दिवसको अवसरमा भृकुटीमण्डपमा आयोजना गर्न लागिएको प्रदर्शनमा पार्टी कार्यकर्ता तथा सर्वसाधारणको बाक्लो उपस्थितिको व्यवस्था मिलाउन च्यासलमा डाकिएको भेलामा नेताहरुलाई जिम्मेवारी दिइएको जानकारी गराइएको छ ।

जनसंगठनका अध्यक्ष, इञ्चार्ज र काठमाडौं उपत्यकाका तीन वटै जिल्लाका वडा तहसम्मका पदाधिकारीहरुको भेलामा प्रदर्शन तयारीको नेतृत्व वरिष्ठ उपाध्यक्ष ईश्वर पोखरेल र स्थायी कमिटी सदस्य कृष्णगोपाल श्रेष्ठलाई दिइएको छ ।  

जनसंगठनहरुको संयोजन सचिव गोकर्ण विष्टले, सुदूरपश्चिम र कर्णाली प्रदेश समन्वयको जिम्मा सचिव लेखराज भट्टले, बागमती प्रदेशका जिल्लाको उपमहासचिव प्रदीप ज्ञवाली, लुम्बिनी र गण्डकीका जिल्ला समन्वयको जिम्मा सचिव पद्मा अर्याललाई तोकिएको छ ।

त्यस्तै कोशी प्रदेशका जिल्लाको समन्वय उपाध्यक्ष रामबहादुर थापा, मधेश प्रदेशका आठवटै जिल्लाका सम्पर्क मञ्चहरूको समन्वय उपाध्यक्ष युवराज ज्ञवालीले गर्ने भनिएको छ । ललितपुरको समन्वय गर्ने जिम्मा उपाध्यक्ष अष्टलक्ष्मी शाक्य र भक्तपुरको गुरु बराललाई दिइएको छ ।

उपाध्यक्ष सुरेन्द्र पाण्डेलाई उपत्यका बाहेक बागमतीका १० जिल्लाको समन्वय, उपमहासचिव एवं प्रधानमन्त्रीका प्रमुख सल्लाहकार विष्णु रिमाललाई स्वयमसेवकको जिम्मेवारी र उपत्यका विशेषको संयोजन जिम्मेवारी सचिव योगेश भट्टराईलाई दिइएको छ । पार्टी विभागको संयोजन सचिव छविलाल विश्कर्माले गर्ने भनिएको छ ।