तीन दर्जन जिल्लामा बाढीको जोखिम, डेढ दर्जनमा ‘एल्लो वारेन्ट’
जल तथा मौसम विज्ञान विभागको बाढी पूर्वानुमान महाशाखाले आज देशका विभिन्न स्थानमा बाढीको सम्भावना देखाएको छ ।
काठमाडौं उपत्यकासहित ३७ जिल्लाका नदी तथा तटीय क्षेत्रमा आज बाढी आउनसक्ने महाशाखाले जानकारी दिएको हो ।
ती क्षेत्रमा बाढीको उच्च जोखिम देखिएको जनाउँदै महाशाखाले सतर्कता अपनाउन आग्रह गरेको छ । महाशाखाले १८ वटा जिल्लामा ‘एल्लो वारेन्ट’ समेत जारी गरेको छ । जसमा भोजपुर, संखुवासभा, सोलुखुम्बु, दोलखा, सिन्धुपाल्चोक, सिन्धुली खोटाङ, गोरखा, तनहुँ, लमजुङ, कास्की, स्याङ्जा, पर्वत, म्याग्दी, नवलपुर पूर्व, पाल्पा र रुपन्देही रहेका छन् ।
यस्तै, पाँचथर, तेह्रथुम, ओखलढुंगा, ताप्लेजुङ, धनकुटा, काभ्रे, मकवानपुर, काठमाडौं, नवलपुर पश्चिम, अर्घाखाँची, बाँके, दाङ, प्युठान, जाजरकोट, बैतडी, दार्चुला, बझाङ, डोटी, डडेल्धुरा र आसपासका जिल्ला भई बहने अधिकांश स–साना नदीमा बहाव बढ्ने महाशाखाले जनाएको छ ।
‘एल्लो वारेन्ट’ ले जलसतह सतर्कता तह आसपास पुग्ने र बाढीको मध्यम जोखिम रहने संकेत गर्दछ । महाशाखाका अनुसार आगामी तीन दिन कोशी, कर्णाली, महाकाली र यसका प्रमुख सहायक नदीसँगै पूर्वी र पश्चिम राप्ती, कन्काई, कमला, बागमती र बबई नदीको जलसतह घटबढ भइरहनेछ ।
ती नदीका तटीय क्षेत्रमा बस्नेहरुलाई सतर्कता अपनाउन अनुरोध गरिएको छ ।
टिप्पणीहरू