विद्यार्थीको प्रश्नमा सांसद भण्डारीको जवाफ,‘२०८४ पछि देशको नेतृत्व गर्ने चाहना छ’

युथ भिजिट नेटवर्कले ‘विद्यार्थीसँग जनप्रतिनिधिः विचार विमर्श’ कार्यक्रम गरेको छ । कुपण्डोलस्थित वेस्ट मिनिस्टर कलेजमा हिजो नेपाली काँग्रेसका वरिष्ठ नेता तथा सांसद डा.चन्द्र भण्डारीको प्रमुख उपस्थितिमा अन्तरक्रिया कार्यक्रम गरिएको हो । 

कार्यक्रममा सांसद भण्डारीले मुलुकको राजनीति, वर्तमान अवस्था, देशको विकासमा युवाको भूमिका र आफ्नो दृष्टिकोण राखेका थिए । त्यसैगरी, उनलाई विद्यार्थीहरुले प्रश्न पनि सोधेका थिए । एक विद्यार्थीले सोधेको ‘तपाईँ यति लामो समयदेखि राजनीतिमा हुनुहुन्छ, तर किन मन्त्री बन्नुभएन् ?’,भन्ने प्रश्नमा जवाफ दिँदै उनले भने,‘अहिले मन्त्री बन्ने रहर छैन । तर, २०८४ सालपछि देशको नेतृत्व गर्ने चाहना भने छ ।’

राजनीतिमा पद वा हैसियतभन्दा पनि दीर्घकालीन राष्ट्र निर्माण र प्रणालीगत परिवर्तनलाई प्राथमिकता दिएको बताउँदै उनले मुलुकको वर्तमान अवस्था जटिल र चुनौतीपूर्ण रहेको जानकारी दिए । त्यसैगरी, उनले युवाहरुलाई सक्रिय, जिम्मेवार र सचेत भएर राजनीतिमा लाग्न आग्रह गरे ।