कुलिङ पिरियड छानबिन समितिको ११६ पेज लामो प्रतिवेदन सार्वजनिक

संघीय निजामती सेवा विधेययकको ‘कुलिङ अफ पिरियड’ गडबडी छानबिन गर्न गठित संसदीय विशेष समितिको प्रतिवेदन सार्वजनिक भएको छ । समितिका संयोजक जीवन परियारले सभामुख देवराज घिमिरेलाई प्रतिवेदन बुझाएका छन् । 

प्रतिनिधिसभाबाट पारित भई राष्ट्रिय सभामा पुगेको विधेयकको प्रतिवेदनमा भएको त्रुटि छानबिनका लागि गठन गरिएको समितिले २९ दिन लगाएर सरोकारवालासँग छलफलपश्चात प्रतिवेदन तयार गरेको हो । ११६ पृष्ठको प्रतिवेदनमा कुलिङ पिरियडमाथि भएको छेडखानीका लागि कसैलाई पनि तोकेर जिम्मेवार ठहर्याइएको छैन ।   

प्रतिवेदनमा प्रतिनिधिसभाको राज्य व्यवस्था तथा सुशासन समितिका सभापति रामहरि खतिवडा र सोही समितिका सचिव सुरजकुमार दुरालाई नैतिकरुपमा मात्रै जिम्मेवार ठहर गरिएको छ । मुख्य सचिव, प्रधानमन्त्री कार्यालयका सचिव र कानुन मन्त्रालयका सचिवले पदीय आचरण अनुसार काम नगरेको ठहर्याईएको छ । 

विधेयकमा त्रुटी रहेको खुलेसँगै गत असार २३ गते अध्यायन तथा छानविनका लागि समिति गठन भएको थियो । कांग्रेस सांसद परियार नेतृत्वको सात सदस्यीय समितिमा सोही पार्टीका सुशीला थिङ, एमालेबाट ईश्वरी घर्ती र नारायणप्रसाद आचार्य, माओवादी केन्द्रबाट माधव सापकोटा, रास्वपाबाट गणेश पराजुली र राप्रपाबाट रोशन कार्की सदस्य थिए ।