'जनयुद्धको योगदानलाई स्थापित गर्न नसक्दा बेथिती मौलायो'

नेकपा माओवादी केन्द्रका अध्यक्ष तथा भूतपूर्व प्रधानमन्त्री पुष्पकमल दाहाल प्रचण्डले जनयुद्धलाई आतंककारी युद्धका रुपमा प्रचार गरिएको भन्दै असन्तुष्टि जनाउनुभएको छ । जनयुद्धले नै मुलुकमा राजनीतिक तथा सामाजिक परिवर्तन ल्याएको उहाँले बताउनुभयो । 

आज काठमाडौँमा नवराज पुडासैनीको ‘संघर्षमा सिरानचोक’ पुस्तक लोकार्पण गर्दै प्रचण्डले भन्नुभयो- ,‘जनयुद्धलाई आतंककारी गतिविधि भनेर मात्र व्याख्या गर्ने प्रवृत्ति अझै पनि देखिन्छ, तर यो आन्दोलन लोकतन्त्र, गणतन्त्र र सामाजिक रुपान्तरणको मुख्य वाहक हो भन्ने कुरा सबै दल र समाजले आत्मसात गर्न आवश्यक छ ।’

विवेकभन्दा संख्याको शक्ति ठूलो हुने अहिलेको प्रणालीले नयाँ पुस्तालाई प्रभाव पारिरहेको उहाँले बताउनुभयो । यसले हाम्रो संघर्षलाई कठिन बनाएको उल्लेख गर्नुभयो । 

जनयुद्धको योगदान र प्राप्त उपलब्धिलाई जनस्तरमा पुर्याउन नसकेका कारण आज समाजमा बेतिथी मौलाएको उहाँको भनाइ छ । ७५३ वटै पालिकामा जनताको संघर्षका गाथा र योगदानहरू लिपिबद्ध गर्ने अभियान अघि बढाउनुपर्ने आवश्यकता प्रचण्डले औंल्याउनुभयो ।

'यदि जनयुद्ध र माओवादी आन्दोलनले स्थापित गरेका मान्यताहरूलाई हामीले विद्यालय, कलेज, गाउँ, शहरमा स्थापित गर्न सकेको भए आज देखिएको अराजकता र बेथिति रोक्न सकिन्थ्यो । संख्याको तागत विवेकभन्दा ठूलो हुने प्रणालीले हाम्रो संघर्षलाई कठिन बनाएको छ',उहाँले भन्नुभयो । 

कन्युनिष्ट विचारका प्रणेता मार्क्स, एंगेल्स, लेनिन र माओका पुस्तकसहित लखन थापा, भीमदत्त पन्तलगायतको इतिहास पढेर जनयुद्धको रणनीति तयार पारिएको प्रचण्डले सुनाउनुभयो ।

‘लखन थापादेखि भीमदत्त पन्त, झापा विद्रोहदेखि किसान संघर्षहरूसम्मको इतिहास अध्ययन गरेर नै जनयुद्धको रणनीति तयार भएको थियो’, उहाँले भन्नुभयो, ‘त्यसैले जनयुद्ध कुनै अन्तर्राष्ट्रिय शक्तिको दबाब भएको थिएन, दबाबमा दबिएन, त्यसैले नै जनताले निरन्तर साथ दिए ।’