‘श्रम संस्कृति पार्टी’ को अध्यक्ष हर्क साम्पाङ

लामो समयदेखि राजनीतिक पार्टी खोल्ने तयारी गरिरहेका धरान उपमहानगरपालिकाका मेयर हर्क साम्पाङले अन्ततः दल दर्ताको लागि निर्वाचन आयोगमा निवेदन दिएका छन् । उनले ‘श्रम संस्कृति पार्टी’ नामक दल दर्ताको लागि आवश्यक कागजातसहित आयोगमा निवेदन बुझाएका हुन् । 

०७९ को स्थानीय तहको निर्वाचनमा स्वतन्त्र उम्मेद्वार बनेर धरान उपमहानगरपालिको मेयर निर्वाचित बनेका साम्पाङले गत वर्ष नै राजनीतिक पार्टी खोलेर ०८४ (तत्कालिक अवस्था) को निर्वाचनमा भाग लिने उद्घोष गरेका थिए । तर जेनजी प्रदर्शनपछि सुशीला कार्कीको नेतृत्वमा अन्तरिम सरकार गठन भइसकेको र चुनावको मितिसमेत घोषणा भइसकेको अवस्थालाई मध्यनजर गर्दै साम्पाङले असोज ७ गते नै दल दर्ताको लागि निवेदन दिएको बुझिएको छ । 

धरानको मेयर निर्वाचित भइसकेपछि ‘श्रम अभियान’ चलाउँदै आएका साम्पाङ अन्तरिम सरकारमा सहभागी हुन दौडधुप गरेका थिए । तर उनलाई जेन जी प्रदर्शनको स्टेक होल्डर दावी गर्ने समूहले खासै वास्ता नगरेपछि दल खोल्ने निर्णयमा पुगेको बताइन्छ । 

निर्वाचन आयोगले भने साम्पाङले पेश गरेको कागजातमाथि अध्ययन भइरहेको र केही दिनमा दर्ताको निर्णय हुने बताएको छ ।