विपिनको सम्झनामा दीप प्रज्वलन, मैनबत्ती बोकरै आउन आह्वान

जेनजीहरुले प्यालेष्टिनी विद्रोही समूह हमासको अपहरणमा परेर ज्यान गुमाएका नेपाली विद्यार्थी विपिन जोशीको सम्झनामा दीप प्रज्वलन गर्ने भएका छन् । आज अपरान्ह साढे ५ बजे काठमाडौंको माइतीघर मण्डलामा दियो बाल्न लागेका हुन् । 

जेनजी अगुवा रक्षा बमले सामाजिक सञ्जालमा स्ट्याट्स लेख्दै दीप प्रज्वलनमा सहभागी हुन आह्वान गरेकी छन् । विपिनलाई फिर्ता ल्याउन तत्कालीन राज्यसत्ताले उचित कूटनीतिक पहल नगरेको आरोप लगाउँदै उनले सबैलाई आफैं मैनबत्ती बोकेर आउन पनि भनेकी छन् । 

‘विपिन जोशीलाई हमास विद्रोहीहरुले बन्धक बनाइसकेपछि पनि उनलाई फिर्ता ल्याउनका लागि तत्कालीन राज्यसत्ताले उचित कूटनीतिक पहल चालेको पाइएन । यसरी भविष्य बनाउन हिँडेको एउटा उज्यालो कहिल्यै नफर्किनेगरी अस्ताएको छ’,उनले लेखेकी छन् ।

‘अर्न एण्ड लर्न’ कार्यक्रमका लागि इजरायल पुगेका कञ्चनपुरका विपिनलाई दुई वर्षअघि हमासले आक्रमणको क्रममा नियन्त्रणमा लिएर बन्धक बनाएको थियो । उनी जीवितै रहेको आशा गरिएकोमा गत असोज २७ गते इजरायलस्थित नेपाली राजदूतावासले मृत्यु भइसकेको औपचारिक जानकारी दिएको हो ।