सुशीलाको ठाउँमा आफूलाई सरकार दिन राष्ट्रपतिसँग हारगुहार

जेनजी विद्रोहको बलमा प्रधानमन्त्री बनेकी सुशीला कार्कीले आन्दोलनको अपेक्षा पूरा गर्न नसकेको भन्दै दुई दर्जन जेनजी समूहले उनलाई फिर्ता बोलाउन राष्ट्रपतिसँग माग गरेका छन् । आज राष्ट्रपति रामचन्द्र पौडेललाई ज्ञापनपत्र बुझाउँदै विभिन्न २३ जेनजी समूहले कार्की नेतृत्वको सरकारलाई फिर्ता बोलाई आफूहरुको नेतृत्वमा नयाँ सरकार गठनको माग गरेका हुन् । 

सरकारले विद्रोहीका न्यूनतम अपेक्षासमेत पूरा गर्न नसकेको र एक थान चुनाव गराउन मात्र लागिपरेको उनीहरुको आरोप छ । भनिएको छ, ‘विद्रोही पक्षका माग पूरा गर्न सक्दैन भने यो सरकारलाई फिर्ता बोलाई हाम्रो नेतृत्वमा नयाँ सरकार गठनको लागि मध्यस्थताको भूमिका निर्वाह गर्न सम्मानीयज्यूसमक्ष निवेदन गर्दछौं ।’ अन्यथा,आन्दोलनमा उत्रिने उनीहरुको चेतावनी छ ।

यो सरकारलाई फिर्ता बोलाई हाम्रो नेतृत्वमा नयाँ सरकार गठनको लागि मध्यस्थताको भूमिका निर्वाह गर्न सम्मानीयज्यूसमक्ष निवेदन गर्दछौं 

जेनजी नेशनल फ्रन्ट लाइनर,जेनजी स्पार्क,एनटेक जेनजी, ऋणी एसोसिएसन नेपाल, जेनजी वाई युनाइटेड, जेनजी सभा, जेनजी पार्लियामेन्ट, जिबिबि गु्रप, जियूपिसि गु्रप, जेबाइएन गु्रप, जेनजी युनाइटेड, जेनजी २.०, रियल जेनजी, जेनजी वाई गु्रप, जेनजी एलायन्स, नेपाल जेनजी रिभ्युलेन्स, इक्वीटि नेपाल, समता जेनजी, अल नेशन जेनजी, स्वतन्त्र जेनजी नेपाल, डिजिटल टास्क फोर्स जेनजी गु्रप, जेनजी एकता मञ्च र जेनजी मुभमेन्ट नेपालले संयुक्त रुपमा ज्ञापनपत्र बुझाएका हुन् ।