यता जित्नासाथ उता गुण्डुमा राति बोलाएर लड्डु

कलेजका साहुजीहरुको संगठन ‘उच्च शिक्षालय तथा माध्यमिक विद्यालय संघ, नेपाल (हिसान)’ को नवौं राष्ट्रिय महाधिवेशन सम्पन्न भएको छ ।  महाधिवेशनले दुई कार्यकाल संगठनको नेतृत्व गरेका पदाधिकारीहरुलाई बढार्दै नयाँ नेतृत्व चयन गरेको छ । नेकपा एमाले र नेपाली काँग्रेसको गठबन्धनबाट उठेका उम्मेदवार पुरै ‘क्लिन स्वीप’ हुँदा एमालेकै अर्को पक्षले जितेको छ । गत पुस ११ गते राजधानीको बुढानिलकण्ठस्थित पार्क भिलेज रिसोर्टमा महाधिवेशनको उद्घाटन भएको थियो ।  

उपराष्ट्रपति रामसहायप्रसाद यादवले उद्घाटन गरेको दुई दिने महाधिवेशनमा झण्डै पाँच सयमध्येबाट ३ सय प्रतिनिधि सहभागी थिए जसले युवराज शर्माको प्यानललाई जिताएर लोकबहादुर भण्डारीको प्यानललाई हराएका छन् । भण्डारी संगठनका पूर्वमहासचिव हुन् भने शर्मा पूर्व वरिष्ठ उपाध्यक्ष । शर्माले १६७ भोट पाउँदा भण्डारी १०६ मा सीमित भए । त्यसैगरी,महासचिवमा एमाले महासचिवमा पराजित सुरेन्द्र पाण्डेनिकट चितवन–काठमाडौं सम्पर्क मञ्चका पूर्वअध्यक्ष रामहरि सिलवालले विजय हासिल गरेका छन् ।

स्थापनाको तीन दशकमा पहिलोपटक निर्वाचन हुँदा यसपटक पनि सर्वसम्मत गर्न खोजिएको थियो । तर,एमालेबाट यसअघि संगठनको नेतृत्वमा निर्वाचितहरुसँग एमालेकै प्रतिनिधि रुष्ट भएकाले निर्वाचन गराउनु परेको बताइन्छ । संगठनको सातौं र आठौं महाधिवेशनबाट अध्यक्षमा रमेश सिलवाल र महासचिवमा भण्डारी निर्वाचित भएका थिए ।

रामहरिले ओलीलाई भनेका थिए,‘तपाईँले भूगोल बुझ्नुभएको छैन । तपाईँलाई बद्नाम गराइरहेका छन् तल अध्यक्षज्यू । तपाईँलाई भ्रममा राखेका छन् । तपाईँले फिल्डमा क्रस चेक गर्नुपर्छ ।’ 

सिलवालले एघारौं महाधिवेशन प्रतिनिधिका लागि पनि पार्टीको शैक्षिक बिभागभित्र उम्मेदवारी दिएका थिए । २१ मध्ये तीन भोट ल्याएका उनलाई केन्द्रीय सदस्य बनाएर शिक्षा विभाग दिन्छु भनिएको थियो । तर,संगठनका प्रतिनिधिहरुले त्यसमा विरोध जनाए । सिलवाल महाधिवेशन प्रतिनिधिमा पछि परेपछि भण्डारीले अध्यक्ष हुने चाहना देखाए । तर,एमालेकै प्रतिनिधिहरुले असहमति जनाए । जसपश्चात् उनी काँग्रेससँग गठबन्धन गर्न पुगे ।

सिलवाल र भण्डारीले दुई कार्यकाल ‘बालकोट’ को रटान लगाएरै व्यतित गरेको हिसानका प्रतिनिधिहरुको आरोप छ । फेरि तिनै भण्डारीलाई संगठनको जिम्मेवारी दिन नहुने अठोटमा पुगेकाहरुले एमाले–एमालेको टिम बनाए । एमालेका भण्डारी अध्यक्षमा उठ्दा काँग्रेसका जयराम खनालले महासचिवमा उम्मेदवारी दिएका थिए । अर्को टिमबाट युवराज र रामहरि अध्यक्ष र महासचिवमा उठे । काँग्रेससँग गठबन्धन गर्दागर्दै भण्डारीको पुरै प्यानल हारेको हो ।

स्रोत भन्छ,‘दुई कार्यकाल उनीहरुले  सँधै बालकोट भनिरहे । हामीले अब यसरी हुँदैन भनेर एमाले–एमालेको टिम बनायौं । ७० प्रतिशत एमाले हाम्रो साथमा थिए । त्यसैले उनीहरु पराजित भए ।’ आफ्नो मान्छे हारेपछि एमाले अध्यक्ष केपी शर्मा ओलीले जितेकाहरुलाई गुण्डुमा आमन्त्रणा गरेका थिए । अस्ति  सोमबार राति युवराज र रामहरिलाई बोलाएर उनले लड्डु खुवाउँदै बधाई दिएका हुन् । सँगै उनले युवराज र रामहरिलाई आफ्नो मान्छे भन्दै मख्ख पार्न खोजे । 

सहभागी एक जनाले भने,‘उहाँले सोमबार राति बोलाउनुभएको थियो । हामी गएपछि उहाँले लड्डु खुवाउँदै बधाई दिनुभयो । तपाईँहरु पनि हाम्रै मान्छे हो भनेर टाकटुक कुरा मिलाउन खोजिरहनुभएको थियो ।’ भेटमा रामहरिले ओलीलाई भनेका थिए,‘तपाईँले भूगोल बुझ्नुभएको छैन । तपाईँलाई बद्नाम गराइरहेका छन् तल अध्यक्षज्यू । तपाईँलाई भ्रममा राखेका छन् । तपाईँले फिल्डमा क्रस चेक गर्नुपर्छ ।’