महन्थ ठाकुर निश्कासनको पत्र बहादुर भवन पुग्यो

जनता समाजवादी पार्टी (जसपा) का अध्यक्ष महन्थ ठाकुर सहित चार नेतालाई निश्कासन गर्ने केन्द्रीय कार्यकारिणी समितिको निर्णयको औपचारिक जानकारी निर्वाचन आयोग पुगेको छ ।

हिजो बसेको जसपा केन्द्रीय कार्यकारिणी समिति बैठकले ठाकुर, वरिष्ठ नेता राजेन्द्र महतो, लक्ष्मणलाल कर्ण र सर्वेन्द्रनाथ शुक्लालाई पार्टीबाट निकाल्ने निर्णय गरेको थियो । अध्यक्ष उपेन्द्र यादवले निर्वाचन आयोगलाई पत्र पठाएर आज निश्कासनको जानकारी गराउनुभएको हो ।यादवको पत्रमा चारै जना नेताले पार्टीको विधान, नीति र निर्णयहरु विपरित कार्य गरेकाले जेठ ८ गतेको कार्यकारिणी समिति बैठकले स्पष्टिकरण सोध्ने निर्णय गरेकोमा कुनै जवाफ नदिएकाले पार्टी विधान र दलसम्बन्धी ऐनअनुसार पार्टीबाट निकाल्न परेको ब्यहोरा उल्लेख छ ।

साथै,राजनीतिक दलसम्बन्धी ऐन ०७३ को दफा ५१ को (१),(२) र (३) बमोजिम चारै जनाको नाम दलको दर्ता किताबबाट हटाई अद्यावधिक गर्न पत्रमा आग्रह गरिएको छ ।