निषेधाज्ञापछि बल्ल रेल,सामाजिक सञ्जालबाट निकालिँदै तेल

भौतिक पूर्वाधार तथा यातायात मन्त्री वसन्तकुमार नेम्वाङले निषेधाज्ञा खुल्नेबित्तिक्कै जनकपुर–जयनगर रेल सञ्चालन गर्ने तयारी थाल्न रेल विभागलाई निर्देशन दिनुभएको छ ।

नेम्वाङले पानीजहाज कार्यालय, मेट्रो रेल विभाग र यातायात व्यवस्था विभागका प्रमुखहरुसँग छलफल गर्दै रेल विभागलाई निषेधाज्ञापछि रेल सञ्चालन गर्ने गरी सम्पूर्ण तयारी थाल्न निर्देशन दिनुभएको हो । नीतिगत, व्यवहारिक र प्राविधिक सम्पूर्ण कुराहरुको व्यवस्थापन भइसक्दा पनि रेल सञ्चालनमा ढिलाइ भएकाले छिटो सञ्चालनमा ल्याउने उहाँले बताउनुभएको छ ।उता नेपाल रेल्वे कम्पनीका महाप्रबन्धक गुरु भट्टराईलाई भने राष्ट्रिय राजनीतिमा बालुवाटारको तावेदारी र अन्य नेताको बदख्वाईं गरेर सामाजिक सञ्जालमा लेख्नमै भ्याइ नभ्याइ छ ।

मन्त्री नेम्वाङले पानीजहाज सञ्चालनका लागि तयारी गर्न तथा नदीनालाहरुमा सम्भाव्यता अध्ययनको काम अघि बढाउन पानीजहाज कार्यालयलाई पनि निर्देशन दिनुभएको छ । उहाँले पानीजहाज सञ्चालनको निम्ति रुट बनाउँदा कोशीमा खुवालुङको ढुंगाको संरक्षण गर्नुपर्ने बताउनुभएको हो ।

यातायात व्यवस्था विभागले हालसम्म कुनै प्रगति देखाउन नसकेको भन्दै स्मार्ट कार्ड प्रिन्ट, ठेक्का सम्झौता,भाडा समायोजनलगायतको विषयमा परिणाम देखिने गरी काम गर्न पनि निर्देशन दिनुभएको बताइन्छ ।