तिब्बती शरणार्थीहरुको सम्भावित उपद्रवप्रति सुरक्षा निकाय सतर्क

धार्मिक नेता दलाई लामाको जन्मोत्सव पारेर नेपालमा रहेका तिब्बती शरणार्थीहरुले चीनबिरुध्द गर्नसक्ने सम्भावित उपद्रवप्रति सुरक्षा निकायले काठमाडौंमा विशेष सतर्कता अपनाएको छ । आगामी मंगलबार जुलाई ६ ताखिका दिन दलाई लामाको जन्मदिन हो ।

सरकारी तथ्याङ्कअनुसार नेपालमा १३ हजार ६ सय ८५ जना तिब्बती शरणार्थी छन् । तीमध्ये झण्डै ९ हजार काठमाडौं उपत्यकाका विभिन्न स्थानमा छन् । अरु काठमाडौं बाहिरका सोलुखुम्बु, कास्की,तनहुँ,रसुवा,स्याङ्जा, बागलुङ,मनाङ र मुस्ताङमा रहेका छन् ।काठमाडौंको बौध्दमा सबैभन्दा बढी ४ हजार ८ सय ४६ ,त्यसपछि स्वयम्भूमा १ हजार ८ सय ७६ जना शरणार्थी बसेको देखिन्छ । त्यसैगरी जावलाखेलमा ९ सय ८४,फर्पिङमा ७ सय ९९, जोरपाटी गुम्बामा ६ सय ५, जोरपाटीमा १ सय ६२ बसोबास गर्छन् ।

काठमाडौं बाहिर सबैभन्दा धेरै पोखरामा १ हजार ८ सय ४९, सोलुखुम्बुमा ७ सय २८,तनहुँमा ५ सय ८८, रसुवामा २ सय १, स्याङ्जामा २ सय ८६, बागलुङमा १ सय ८३, मनाङमा ३ सय २८ र मुस्ताङमा २ सय ५० जना तिब्बती शरणार्थी रहेको देखिन्छ ।

अस्ति मात्र चिनियाँ कम्युनिष्ट पार्टीको शतवार्षिकी धुमधामका साथ मनाइएको छ । त्यस अवसरमा राजधानी बेइजिङमा आयोजित विशेष समारोहमा बोल्दै राष्ट्रपति सि चिनफिङले चीनको सार्वभौमसत्तामाथि चुनौति दिने जोसुकैको टाउको चिनियाँ जनताको रगत र शरिरबाट बनेको ग्रेटवालको स्टिलमा ठोक्किने चेतावनी दिनुभएको थियो ।

चीनले तिब्बत,ताइवान,हङकङ र मकाओको बारेमा अनाधिकृत तवरले टिप्पणी गरेमा उसले आफ्नो सार्वभौमसत्तामाथि बोलिएको धावाको रुपमा लिने गरेको छ ।